اسلام آباد۔20نومبر (اے پی پی):گلگت بلتستان دے چیف سیکرٹری محی الدین احمد وانی آکھیا جو گلگت بلتستان دے184 سکولاں کوں شمسی توانائی تے کیتا ویندا پے۔ اے پی پی نال ڳالھ مہاڑ کریندیں ہوئیں چیف سیکرٹری آکھیا جو گلگت بلتستان اچ تعلیمی اداریاں دی ڈیجیٹائزیشن کیتے کم تھیندا پے جئیں دامقصد تعلیمی اداریاں اچ پاݨی اتے بجلی دی بلاتعطل فراہمی یقینی ٻݨاوݨ اے۔ انہاں آکھیا جو شمسی توانائی تے تھیوݨ آلے تعلیمی اداریاں کوں نہ صرف سولر بیک اپ ݙتا ویسی جڈانجو لوڈشیڈنگ دے مسئلے تے قابو پاوݨ کیتے ودھیکی بیٹریاں دے تحت بیک اپ وی ملسی۔ انہاں آکھیا جو ایں کوشش نال پہاڑی علاقیاں دی عوام دی معیار زندگی اچ نشابر تبدیلی امسی اتے نینگراں کوں جدید ٹیکنالوجی توں فائدہ چاوݨ دی سہولت ملسی جیڑھا گلگت دے بعد سکردو اچ سافٹ ویئر ٹیکنالوجی پارک ٻݨاوݨ دا راہ سوکھا کریسی۔
انہاں آکھیا جو ہر نسل کوں نویں انقلاب دی لوڑھ ہوندی اے اتے اساں گلگت بلتستان اچ ٹیکنالوجی دے انقلاب تے یقین رکھیندوں۔ ایں بارے حکومت گلگت بلتستان ولوں سپیشل کمیونیکشن آرگنائزیشن دے تعاون نال گلگت دے بعد سکردو اچ آئی ٹی پارک وی ٻݨایا ویسی۔ انہاں آکھیا جو گلگت بلتستان دے لینڈ سکیپ اچ تبدیلیاں کیتی ویسن اتے اینکوں ترقی یافتہ ملکاں دی طرز تے سمارٹ شہراں اچ منتقل کیتا ویسی اتے ٹیکنالوجی دی ترقی نال علاقے دی معیشت کوں ودھارا ملسی۔ انہاں آکھیا جو نینگراں دی تعلیم تے تربیت کیتے فنانس سکیم وی متعارف کرائی ویندی پی اے۔ ایں سکیم دے تحت گلگت بلتستان دے طلباء ہائر ایجوکیشن پروگرام دے تحت پاکستان دی 15 بہترین یونیورسٹیاں اچ داخلے ڳھن سڳسن اتے انہاں کوں ساری تعلیمی خرچے اتے فیساں کیتے سو فیصد قرضے ݙتے ویسن۔
