اسلام آباد۔22نومبر (اے پی پی سرائیکی نیوز سروس) سرائیکی اسکالر سئیں پروفیسر گرجا کمار دی نیو دہلی وچ وفات نال سرائیکی وسیب دا وݙا ضیان تھئے جیندے تے وسیب نال مکاݨ اے۔ اے ڳالھیں سرائیکی اگواݨ خواجہ عبید تفصیل نال گالھ مہاڑ کریندے ڈسائے جو پروفیسر گرجا کمار سرائیکی وسیب دے ہک عظیم سوجھواݨ اتے سکالر ہن اتے شری نریندر کمار سرپرست اعلی سرائیکی سہتیہ سنگم دے وݙے بھرا ہن. پہلی انٹرنیشنل سرائیکی کانفرنس نیو دہلی دے دوران خواجہ عبید کوں پرفیسر گرجا کمار دا ٹبر خصوصا انہاں دی اماں نال ملݨ دا موقع ملیا جنہاں انھاں کوں ملخ دی ونڈ توں پہلے دیرہ غازیخان بارے اپݨیاں یادداشتاں بارے حال ڈتا . ایں ملاقات وچ سرائیکی تحریک دے اگوانڑ بیرسٹر تاج محمد خان لنگاہ،دانشور محمود نظامی، عبدالمجید کانجو اتے ٻئے اڳواݨ وی شامل ہن. پروفیسر گرجا کمار سرائیکی زبان اتے وسیب بارے انگلش وچ ہک کتاب وی لکھی. انہاں دی وفات بلاشبہ سرائیکی زبان تے ادب کیتے ٻہوں وݙے ارمان دی خبر اے . تمام سوگواران اتے اہل خانہ نال مُکاݨ اے۔
