اسلام آباد۔2دسمبر (اے پی پی سرائیکی نیوز سروس ) ڈاکٹر غضنفر مہدی اے پی پی دی سرائیکی سروس نال گالھ مہاڑ کریندے “سرائیکی ” ناں متفقہ طور تے رکھیا گیا کیونجو ایندے توں پہلے اوں ویلھے اینکوں ملتانی زبان آہدے ہن تے بہاول پور آلیں بہالپوری رحیم یار خان دے رہݨ آلیں ریاستی آکھدے ہن تےاوں ویلھے سرائیکی مشاعرے وی تھیندے ہن۔ اوں ویھلے ساݙے ساریاں وݙیریاں سوچیاجو اینکوں ھک پلیٹ فارم تے جمع کروں تاں جو صوبے دی تحریک شروع کیتی ونڄ سڳے۔12 نومبر 1962 کوں ساریں متفقہ طور تے مخدوم سجاد حسین قریشی شاہ محمود قریشی دے والد دے گھر ھک کٹھ تھیا پیر حسام الدین راشدی اوندی صدارت کیتی جیندے وچ بریگیڈئر نذیر علی شاہ ، صدیق طاہر ، ارشاد کلانچوی، رشید قیصرانی ،غلام حسن حیدرانی ، جانباز جتوئی ، جعفر طاہر تے شوق صاحب سارے کھٹے تھئے انہاں رل تے طے کیتا جو اڄ توں بعد اساں اینکوں ملتانی ، بہاول پوری ، ریاستی تے اینکوں جھنگوی نہ آکھسوں ایندا ناں سرائیکی ہوسی۔ ایں سانگے ہنڑ ایندا ناں ہر پاسے سرائیکی ای اکھویندے۔
