آپݨی دھرتی نال جڑت رکھیے بغیر آفاقیت دی گالھ نی تھی سگدی، ناول نگار حفیظ خان دا اپݨے اعزاز اچ تقریب نال خطاب

اسلام آباد۔5دسمبر(اے پی پی سرائیکی نیوز سروس)آپݨی دھرتی نال جڑت رکھیے بغیر آفاقیت دی گالھ نی تھی سگدی، اے ڳالھ جڳ مشہور لکھاری حفیظ خان آپے اعزاز وچ ݙتے ڳئے کراچی پریس کلب اچ ظہرانے اچ آکھی۔ احمدپور شرقیہ توں دے ݙو درجن توں ودھ کتاباں دے مصنف حفیظ خان دے اعزاز اچ کراچی پریس کلب اچ تقریب تھئی۔ تقریب نال الیندے حفیظ خان دا آکھݨ ہا جو عالمگیریت تئیں پڄݨ کیتے مقامیت ٻہوں ضروری اے۔ ایں موقع تے سینئر صحافی سعید خاور، حفیظ خان دیاں ادبی خدمات دی تعریف کریندے آکھیا جو حفیظ خان اردو ناولاں دی کہانی وی سرائیکی اچوں گھدی اے، انہاں ناولاں اچ ادھ ادھورے لوک، انواسی، کرک ناتھ تے حیدر گوٹھ دا بخشن قابل ذکر ہین۔ تقریب اچ کراچی دے سینئر صحافی عبدالوحید راجپر، سعید خاور، شاہد جتوئی، ارشاد امین، اختر شاہین رند، احسن جتوئی شریک تھین۔ تقریب دے چھیکر تے حفیظ خان کوں سندھی ٹوپی تے اجرک وی پوائی گئی۔