اسلام آباد۔13دسمبر(اے پی پی) وزیر خارجہ بلاول بھٹو زرداری 14 توں 21 دسمبر دے دوران امریکا دا سرکاری دورہ کریسن ۔ وزیر خارجہ دورے وچ ٻہوں سارے کثیرالجہتی اتے ݙو پاسے ملاقاتاں کریسن ۔ منڳل کوں وزارت خارجہ توں جاری بیان موجب وزیر خارجہ بلاول بھٹو زرداری 15 اتے 16 دسمبر کوں نیویارک اچ گروپ۔77 وزراء خارجہ پلس چین دی وزارتی کانفرنس دی میزبانی اتے صدارت کریسن جیڑھا جو اقوام متحدہ اچ ترقی پذیر ملکاں دا ساریں توں وݙا مذاکراتی بلاک اے۔ کانفرنس دے ایجنڈے اچ ترقی پذیر ملکاں کوں کووڈ۔ 19 دی عالمگیر وبا، موسمیاتی تبدیلیاںپاروں آندیاں آفتاں تے جغرافیائی سیاسی پیش رفت دے تناظر اچ پائیدار ترقیاتی اہداف (ایس ڈی جیز ) دے حصول اچ درپیش ٻہوں سارے چیلنجاں تے بحث شامل اے۔ وزیر خارجہ اقوام متحدہ دے سیکرٹری جنرل انتونیو گوتیرس نال ملاقات کریسن تے 14 دسمبر کوں منعقد تھیوݨ آلے “بین الاقوامی امن اتے سلامتی دی بحالی: اصلاح شدہ کثیرالجہتی کیتے نویں سمت” دے موضوع تے اقوام متحدہ دی سلامتی کونسل اچ ھک اعلیٰ سطحی بحث اچ حصہ گھنسن ۔ وزیر خارجہ 19 دسمبر کوں واشنگٹن ویسن جتھاں او اعلیٰ سطح دے سرکاری حکام، کانگریس دے رہنماواں، پاکستانی نژاد امریکی تاجراں اتے کمیونٹی دے ارکان نال ملاقاتاں کریسن ۔ او تھنک ٹینکس اتے میڈیا دے نال وی ملاقاتاں کریسن ۔ انہاں دیاں سرکاری ملاقاتاں اچ سانجھی دلچسپی دے ݙوطرفہ اتے علاقائی امور تے ڳالھ مہاڑ کیتی ویسی تاں جو پاکستان امریکا ݙوطرفہ تعلقات بالخصوص تجارت، سرمایہ کاری، موسمیاتی لچک اتے اقتصادی ترقی دے شعبیں اچ رفتار کوں اڳوں ودھایا ونڄ سڳے۔ وزیر خارجہ موسمیاتی تبدیلیاں بارے پاکستان دے نقطہ نظر بارے وی ݙسیسن ۔
