اسلام آباد۔13دسمبر(اے پی پی) وزیراعظم محمد شہباز شریف دی دعوت تے تاجکستان دے صدر امام علی رحمان کل ٻدھ کوں پاکستان دا 2 ݙینھ دا سرکاری دورہ کریسن ۔ دفتر خارجہ توں جاری بیان موجب دورے اچ ݙوہیں فریقین مختلف شعبیں اچ ݙو پاسے تعاون کوں مزید تکڑا بݨاوݨ تے ڳالھ مہاڑ کریسن ۔ کئی ݙو طرفہ معاہدیں اتے مفاہمت دیاں یادداشتاں تے دستخط تھیوݨ دی توقع اے۔ پاکستان تے تاجکستان پراݨے تاریخی، ثقافتی اتے مذہبی رشتے اچ گھنڈیے ہوئے بھرا ملک ہن ۔ اے تعلقات سانجھے احترام اتے غیر معمولی ہم آہنگی تے مبنی ہن۔ مختلف علاقائی اتے بین الاقوامی مسئلیں تے ݙوہیں ملکاں دا نکتہ نظرھکو سواں اے ۔ تاجکستان وسطی ایشیا اچ پاکستان دا ساریں توں نیڑے پڑوسی اے جیں کوں نہ صرف تنگ واخان راہداری توں انڄ کیتا ڳئے ۔ اے قربت تاجکستان کوں وسطی ایشیا اچ پاکستان دا ھک اہم شراکت دار بݨیندی اے ۔ توقع اے جو تاجک صدر دے دورہ پاکستان نال ݙوہیں ملکاں وچال مختلف شعبیں اچ تعاون کوں مزید ودھاوݨ تے ودھدی ہوئی جیو اکنامک پارٹنرشپ کوں مزید تقویت ملسی۔
