اسلام آباد۔13دسمبر(اے پی پی) وفاقی وزیر داخلہ رانا ثناء اللہ خان آکھیے جو 23 جون 2021 کوں جوہر ٹائون لاہور دھماکے اچ ’را‘ ملوث اے تے کئی ملزمان کوں گرفتار کیتا ڳئے ۔ ایجنسیز دہشت گردی دے واضح ثبوت وٹھین ، حکومت فیصلہ کیتے جو ثبوت انٹرنیشنل کمیونٹی دے سامݨے پیش کریسوں تے بھارت دے دہشت گردی دے مکروہ چہرے کوں بے نقاب کریسوں ،بھارتی ایجنٹس دی گرفتاری کیتے انٹرپول توں ریڈ وارنٹ جاری تھی چکن ۔ او منڳل کوں ایڈیشنل انسپکٹر جنرل (اے آئی جی) محکمہ انسداد دہشت گردی پنجاب عمران محمود دے رلے پریس کانفرنس توں خطاب کریندے پئے ہن ۔ وفاقی وزیر داخلہ رانا ثناءاللہ خان آکھیے پاکستان کئی ݙھاکیں توں دہشت گردی دی بھاہ اچ سڑدا پئے ، اے ایجھا بدبخت عمل اےجیں اچ اساں ہر ݙینھ ھک نویں صورتحال توں ݙوچار تھیندوں ، کوئی طبقہ ایجھا کائنی جیں قربانی پیش نہ کیتی ہووے ، یا شکار نہ تھیا ہووے، مسیتاں، امام بارگاہواں ، اہم عمارتاں تے اجتماعات کوں نشانہ بݨایا ڳئے، دہشت گردی دی کوئی وی صورت ہووے، پچھوں کتھائیں نہ کتھائیں بھارت دا ہتھ نظر آندے ۔ انہاں آکھیے بھارت ہر قسم دی دہشت گردی کوں پاکستان اچ پروموٹ کریندے۔ ایجنسیز دہشت گردی دے واضح ثبوت وٹھین تے حکومت فیصلہ کیتے جو ثبوت انٹرنیشنل کمیونٹی دے سامݨے پیش کریسوں تے بھارت دے دہشت گردی دے مکروہ چہرے کوں بے نقاب کریسوں ۔ انہاں آکھیے جنہاں لوکاں اتھاں آپریٹ کیتے او پاکستانی ہن ، حافظ سعید دی رہائش گاہ دے نیڑے واقعہ تھیا ہئی، حافظ سعید گھر کائناں ہن ، شاید فیملی ٹارگٹ ہئی، قیاس اے جو حافظ سعید دی رہائش گاہ ٹارگٹ ہئی لیکن پولیس دی موجودگی دی وجہ توں ڳاݙی حافظ سعید دی رہائش گاہ تئیں نہ پڄ سڳی ۔ وزیر داخلہ آکھیے چھوٹے موٹے نیٹ ورک ملک دے مختلف حصیں اچ بݨدے رہندن ۔ ساݙے ادارے اتے ایجنسیاں ایندے پچھوں لڳیاں پئن ۔ انہاں آکھیے دہشت گردی دے خلاف جنگ اچ عام شہریاں سودھے سارے اداریں قربانیاں ݙتن تے ایندا شکار وی تھئن ۔ انہاں آکھیے کلبھوشن دا گرفتار تھیوݨ بھارت دا سفاک چہرݙکھاوݨ کیتے کافی اے۔ایڈیشنل آئی جی سی ٹی ڈی عمران محمود ݙسایا جو 23 جون 2021 کوں جوہر ٹائون لاہور اچ دھماکا تھیا ہئی ، اڄ تئیں کہیں دہشت گرد تنظیم ایں کاروائی دی ذمے واری قبول نی کیتی لیکن اساں 16 گھنٹے اچ ایں کیس دی تہہ تئیں پڄ ڳئے ہاسے ، ایں دھماکے اچ ترائے ملزمان ملوث ہن ، ترائی کوں گرفتار کر ڳھدا ڳئے جݙاں جو ݙو ملزمان کوں پنج توں چھی ݙینھ اچ گرفتار کیتا ڳیا ہئی ۔ انہاں آکھیے 23 جون 2021 کوں لاہوراچ تھیوݨ آلی دہشت گردی اچ “را” ملوث اے، ھک دہشت گرد کوں اڄوکے سال اپریل اچ بلوچستان توں گرفتار کیتا ڳئے ، عید گل کوں وٹھیا تاں سمیع الحق دی نشاندہی تھئٰ ، سمیع الحق سال 2012 توں را کیتے کم کریندا ہئی ، بھارتی ایجنٹ سمیع الحق کوں بلوچستان توں گرفتار کیتا ڳئے تے ایندا اسلم، سنجے تیواری اتے وسیم نال رابطہ ہئی، بھارت 8 لکھ 75 ہزارڈالرز 4 لوکاں کوں پاکستان اچ دہشت گردی کیتے ݙتے ۔ انہاں ݙسایا جو سنجے کمار تیواری را دے ایجنٹ دے انٹرپول توں ریڈ وارنٹ جاری تھی چکن ۔وسیم حیدرخان اتے اجمل ناں دے بندے دے وی ریڈ وارنٹس جاری تھی چکن ۔
