اسلام آباد۔15دسمبر(اے پی پی)اقتصادی رابطہ کمیٹی دا اجلاس وفاقی وزیر خزانہ و محصولات اسحاق ڈار دی اڳواݨی اچ تھیا جیندے اچ ہک لکھ میٹرک ٹن کھنݙ برآمد کرݨ دی منظوری ݙیندے ہوئے فیصلہ کیتا ڳئے جو کھنݙ دا اڄوکا ملھ 31 جنوری تئیں برقرار رکھیا ویسی اتے ایندے اچ کوئی ودھارا نا تھیسی۔ اجلاس اچ وفاقی وزیر تجارت سید نوید قمر، وفاقی وزیر نیشنل فوڈ سیکیورٹی اینڈ ریسرچ طارق بشیر چیمہ، وزیر مملکت خزانہ و محصولات ڈاکٹر عائشہ غوث پاشا، وزیر مملکت پیٹرولیم مصدق مسعود ملک، معاون خصوصی خزانہ طارق باجوہ، معاون خصوصی ریونیو طارق محمود پاشا، وزیر اعظم دے کوآرڈینیٹر تجارت و صنعت رانا احسان افضل، وزیر اعظم دے کوآرڈینیٹر معیشت بلال اظہر کیانی، وفاقی سیکرٹریز، سینئر افسران اتے ٻئے اعلیٰ حکام شرکت کیتی۔ ای سی سی مالی سال 2022-23 اچ کھنݙ دی برآمد کیتے وزارت نیشنل فوڈ سیکیورٹی اینڈ ریسرچ دی سمری موجب ہک لکھ میٹرک ٹن کھنݙ برآمد کرݨ دی اجازت ݙتی جو کھنݙ دی صورتحال دا جائزہ ہر پندرھواڑے کیتا ویسی۔ ای سی سی وزارت موسمیاتی تبدیلی کیتے 70 لکھ، وزارت ہاؤسنگ اینڈ ورکس دی ترقیاتی سکیماں کیتے 74 کروڑ 35 لکھ روپے دی تکنیکی سپلیمنٹری گرانٹس دی وی منظوری ݙتی۔
