اسلام آباد۔26دسمبر(اے پی پی سرائیکی نیوز سروس) او 24 نومبر 1952ء کوں کراچی اچ جمئی ۔ انھاں دے والد سید ثاقب حسین وی شاعر ہن تے شاکر تخلص ہئی ۔ چندن پٹی لہیریا سرائے ضلع دربھنگہ(بہار) توں تعلق رکھنڑ آلے انھاندے ٹبر اچ کئی نامور شاعر تے ادیب جمئے ۔ جنھاں اچ بہار حسین آبادی معروف ان ۔ تے انھاندے نانا حسن عسکری وی ادبی ذوق رکھدے ہن۔ انھاں نکے لاء ای پروین کوں کئی شاعراں دے کلام نال روشناس کروایا۔ پروین ہک ہونہار طالبہ ہئی ۔ تعلیم دے دورانِ تعلیم اردو مباحثاں اچ او حصہ گھندی رہی ۔ اوندے نال نال او ریڈیو پاکستان دے مختلف علمی ادبی تقریباں اچ شریک تھیندی رہی ۔پروین شاکر پندرہ سال دی عمر اچ شاعری شروع کیتی . شروع اچ مینا تخلص رکھیا ۔پہلی نظم روزنامہ جنگ اچ چھپی . جامعہ کراچی توں انگریزی ادب اتے لسانیات اچ ایم اے کیتا اتے عبداللہ گرلز کالج اچ انگریزی دی لیکچرر دے طور تے خدمات ڈتیاں ۔جیڑھلے سی ایس ایس دا امتحان ڈتا تاں او خود وی حیران رہ گئ جو ہک پرچے اچ انھاندی آپدی شاعری بارے وی سوال ہا۔ امتحان اچ پوزیشن حاصل کیتی اتے کسٹم ڈیپارٹمنٹ اچ شمولیت اختیار کیتی ۔ 1991ء اچ ہارورڈ یونیورسٹی توں پبلک ایڈمنسٹریشن اچ ماسٹرز دی ڈگری گھدی۔ پروین دی شادی انھاندے مسات ڈاکٹر نصیر علی نال تھئی پر 1989 اچ علیحدگی تھی گئی۔ ہک پتر سید مراد علی ہے۔ جیکوں او گیتو آھدی ہئی ۔پروین، احمد ندیم قاسمی توں بے حد متاثر ہئی پہلا مجموعہ چھپواونڑ دا انتظام قاسمی صاحب ہی کیتا ۔26دسمبر 1994ء کوں صرف بتالیھ سال دی عمر اچ اسلام آباد اچ ٹریفک حادثے دا شکار تھی گئی ۔ پروین شاکر روز نامہ ’’جنگ‘‘ اچ ” گوشہ چشم” دے عنوان نال کالم نگاری وی شروع کیتی ہئی۔ زندگی مہلت ڈیوے ہا تاں ایں شعبے اچ وی ناں ہونداں ۔ پروین شاکر دی شاعری دا موضوع محبت اتے عورت اے۔ ۔ زندگی دیاں اوکھیاں راہواں دا احساس تاں بعد اچ تھیا جیندا اظہار انھاندی شاعری اچ جاء جاء تے ملدے ۔ ماء دے جذبات شوہر نال ناچاقی اتے علیحدگی، ورکنگ وومین دے مسئلے کوں ڈاڈھے سوہنڑپ نال قلمبند کیتا اے ۔ انھاں دی شاعری دے اے مجموعے چھپئے ۔ خوشبو (1976ء)، صد برگ (1980ء)، خود کلامی (1990ء)، انکار (1990ء ماہِ تمام (کلیات)(1994ء)
