ملتان۔23فروری (اے پی پی) سرائیکی وسیب دے 2نامور محققین ڈاکٹر مہر عبدالحق اتے منشی عبدالرحمن دی برسی منائی ڳی۔ مہر عبدالحق کوں دنیا توں وچھڑیے 27 سال اتے منشی عبدالرحمن کوں 33 سال تھی ڳن۔ مہر عبدالحق یکم جنوری 1915کوں لیہ اچ ڄمیے ہن۔ میٹرک دے بعد بہاولپور توں ایف ایس سی اتے ایمرسن کالج ملتان توں بی ایس سی دا امتحان پاس کیتا۔ڈپٹی کمشنرآفس اچ 1938 اچ کلرک بھرتی تھیے اتے ولا شعبہ تدریس نال جڑ ڳے۔ سرائیکی زبان بارے مہر عبدالحق دی 14 توں ودھ کتاباں منظر عام تے آئن جئیں اچ قرآن پاک دا سرائیکی ترجمہ،قصیدہ بردہ شریف دا سرائیکی ترجمہ ،عمرخیام دی رباعیات اتے کلام فرید دے تراجم شامل ہن۔ او 23فروری1995کوں ملتان اچ انتقال کر ڳے ہن۔ سرائیکی وسیب دے نامور محقق منشی عبدالرحمن 1912اچ ملتان اچ ڄمیے ہن۔ انہاں نانویں جماعت تئیں تعلیم حاصل کیتی اتے ولا 40 سال تئیں اپݨے ہک وکیل کنے بطور منشی کم کیتا۔ او کیمونسٹ پارٹی ،کانگریس اتے مسلم لیگ نال رہیے۔ انہاں دی تصنیفات دی تعداد20توں ودھ اے جئیں اچ ” تاریخ ملتان ذیشان‘ اتے ”آئینہ ملتان“4‘ انہاں دی سنجاݨ ہن۔ او 23فروری1989کوں ملتان اچ انتقال کر ڳے ہن۔
