اسلام آباد۔9مارچ (اے پی پی):وفاقی وزیر خزانہ و محصولات سینیٹر محمد اسحاق ڈار آکھیے کجھ ݙینھ اچ آئی ایم ایف نال معاہدہ تھی ویسی ، گزریل حکومت ترقیاتی اداریں دے اعتماد کوں ضیان پڄائے ،نویں بجٹ اچ معیشت کوں استحکام ݙیوݨ چاہندوں ، نویں بجٹ اچ عوام کوں ریلیف ݙیوݨ کیتے اقدامات کریسوں، وختی معاشی مسائل تے قابو پا گھنسوں ۔ اے ڳالھ انہاں پبلک فنانشل مینجمنٹ دے ذریعے معاشی استحکام دی بحالی دے موضوع تے منعقدہ سیمینار توں خطاب کریندے ہوئیں آکھی اے ۔وزیر خزانہ اسحاق ڈار آکھیے ترقیاتی شراکت داراں عالمی بینک اتے ایشیائی ترقیاتی بینک دا شکرگزار ہاں۔انہاں آکھیے ملکی معیشت دی بہتری کیتے اقدامات اتے اینکوں ول ٹریک تے گھن آوݨ دی کوشش کریندے پیوں، اساکوں معاشی مشکلات سودھے مختلف چیلنجز دا سامݨا اے، معاشی بحران اساکوں وراثت اچ ملیے ، معیشت دے حوالے نال مس مینجمنٹ دا سامݨا اے، گزریل حکومت دی معاشی پالیسیاں چنڳی معیشت کوں خراب کیتے، پاکستان 2018اچ دنیادی ابھردی معیشتاں اچ شامل ہئی ۔ لیکن ول 2018 اچ ہی معاشی صورتحال اچ اوکھ آوݨ شروع تھئن ، عالمی مارکیٹ اچ پاکستانی مصنوعات دی رسائی ھک چیلنج اے۔وفاقی وزیر آکھیے نویں بجٹ اچ معیشت کوں استحکام ݙیوݨ چاہندوں ، نویں بجٹ اچ عوام کوں ریلیف ݙیوݨ کیتے اقدامات کریسوں ، وختی معاشی مسئلیں تے قابو پا گھنسوں ، پاکستان دی ترقی اچ عالمی بینک ولوں تعاون قابل تعریف اے، اتے اڳوں آندے ݙینھاں اچ آئی ایم ایف نال معاہدے دی امید اے۔اسحاق ڈار آکھیے ماضی اچ غلط پالیسیاں دی وجہ توں بجٹ خسارے دا سامݨا تھیا ، عمران خان پاکستان دے قرضے ودھائے تے آئی ایم ایف دے پروگرام توں پھر ڳئے تے ترقیاتی اداریں دے اعتماد کوں ضیان پڄایا ، اساں آتے سابق حکومت دی طے کیتی ڳئی شرطاں عمل درآمد کیتے، امید اے جو آئی ایم ایف نال معاہدہ کجھ ݙینھ اچ طے پا ویسی ۔وزیر خزانہ آکھیے ن لیگ گزریل دور اچ آئی ایم ایف پروگرام مکمل کیتا، ساݙے دور اچ فی کس آمدنی 379 ڈالر ودھارا تھیا ،مگر پی ٹی آئی دی حکومت اچ چار سالاں اچ صرف 30 ڈالر دا ودھارا تھیا ،اتحادی حکومت کوں تباہ حال معیشت ورثے اچ ملی ،سابق حکومت دی وجہ توں عالمی اداریں تے پاکستان دے درمیان اعتماد دا فقدان پیدا تھیا جݙاں اساں پچھلی حکومت دے عالمی اداریں دے نال وعدے پورے کریسوں ۔ آئی ایم ایف نال وعدے پورے کریسوں وزیر اعظم کفایت شعاری مہم دا اعلان کیتےجیں دے تحت غیر ضروری اخراجات کوں کنٹرول کرݨ دے اقدام کیتے ڳئن ۔ انہاں آکھیے سیلاب متاثرہ علاقیں دی بحالی کیتے 16ارب ڈالر درکار ہن، معاشی مشکلات کوں مکاوݨ اچ ساریں کوں آپݨا حصہ پاوݨا ہوسی ، وفاقی حکومت اپݨے خرچے 15فیصد گھٹ کریسی ۔
