اسلام آباد۔4اپریل(اے پی پی) وفاقی وزیر تعلیم و پیشہ ورانہ تربیت رانا تنویر حسین آکھیے او لیول دی نصابی کتاب اچ غیرمناسب مواد اپݨے ٻالاں کوں پڑھاوݨ دی اجازت نہ ݙیسوں ، کیمبرج انتظامیہ کوں ایں سلسلے اچ خط لکھدے پیوں ، ساݙے مذہب تے معاشرے اچ ایں طرح دا تعلیمی مواد قابل قبول کائنی ۔ سینیٹ دے اجلاس اچ سینیٹر محسن عزیز تے فیصل سلیم الرحمان توجہ ݙیواؤ نوٹس دے جواب اچ آکھیے اٹھارویں ترمیم دے تحت تعلیم دا شعبہ صوبیں کوں منتقل تھی ڳئے ، وفاقی حکومت دا دائرہ کار ٻہوں محدود اے ایں حوالے نال صوبیں کوں وی اساں او لیول دی سوشیالوجی دی نصابی کتاب اچ غیرمناسب مواد دے حوالے نال ݙسیندے پیوں ، کیمبرج دا اپݨا سسٹم اے لیکن ساݙے مذہب تے معاشرے اچ تعلیمی نصاب اچ غیرمناسب مواد کہیں وی صورت قابل قبول کائنی تے نہ ہی ایندی اجازت ݙتی ونڄ سڳدی اے ، انہاں آکھیے اساں کیمبرج انتظامیہ کوں خط لکھیے جو پاکستان کیتے آپݨے نصاب توں غیر مناسب مواد نکالیا ونڄے ، انہاں آکھیے سابق حکومت دے دور اچ جیڑھا تعلیمی نصاب منظورکیتا ڳیا ہئی ایں تے خیبرپختونخوا دے سوا سارے صوبیں دے اعتراضات ہن تے اوں ویلھے دے متعلقہ وفاقی وزیر وی ایں توں متفق کائناں ہن ، اساں ھک مہینے اچ سارے صوبیں دی مشاورت نال تعلیمی نصاب دے معاملات کوں اتفاق رائے نال طے کیتے ۔
