مقبوضہ بیت المقدس۔8مئی(اے پی پی) اقوام متحدہ دےعالمی خوراک پروگرام (ڈبلیو ایف پی)آکھیے 2لکھ توں ودھ فلسطینیاں کوں ݙتی ونڄݨ آلی غذائی امداد فنڈزدی قلت پاروں آندے مہینے توں روک ݙتی ویسی ۔ سعودی ذرائع ابلاغ ڈبلیوایف پی دے کنٹری ڈائریکٹرسمیرعبدالجابر دے حوالے نال ݙسائے جو فنڈز دی شدید قلت پاروں جون توں 2لکھ توں ودھ فلسطینیاں کوں ݙتی ونڄݨ آلی امداد معطل کرݨی پوسی ،اے تعداد ایں دے زیرکفالت لوکاں دا 60 فی صد اے،ساریں توں ودھ متاثرہ خاندان غزہ اتے مغربی کنارے وچ ہن جتھاں غذائی عدم تحفظ اتےغُربت ساریں توں زیادہ اے۔اقوام متحدہ دا ادارہ غریب فلسطینیاں کوں 10.30 ڈالر فی کس دے حساب نال ماہانہ واؤچر اتے خوراک ݙیندے ،ہݨ ایندی طرفوں امداد دی معطلی نال ݙوہیں پروگرام متاثر تھیسن ۔فلسطین اتے اقوام متحدہ دے ریکارڈ موجب غزہ دی پٹی اچ 23لکھ لوک رہندن جنہاں اچوں 45 فیصد بے روزگار اتے 80 فیصد بین الاقوامی امداد تے انحصار کریندن ۔غزہ تے 2007 توں اسلامی تحریک حماس دی حکومت اے جݙاں جو اسرائیل ایندی بحری، بری اتے فضائی ناکہ بندی کررکھی اے۔عبدالجابر آکھیے ڈبلیو ایف پی ایں ناگزیر اتے سخت فیصلے دے لکھاں لوکاں تے پووݨ آلے مضمرات کوں سمجھدے جیڑھے جو آپݨی بنیادی ضروریات دے علاوہ خوراک دی امداد کیتے وی ایں تے انحصار کریندن ۔
