اسلام آباد۔18مئی(اے پی پی سرائیکی نیوز سروس) اسلام آباد کریسنٹ لائینز کلب تے وزارت انسانی حقوق دی سانجھ نال ٹٻراں دے جڳ ݙیھاڑ دی تقریب رکھی ڳئی جیندے اچ اسلام آباد لائینز کلب دے اڳواݨ سبطین لودھی آکھیے جو اقوام متحدہ ولوں اڄ ٹٻراں دا جگ ݙیھاڑ پوری دنیا اچ منایا ڳئے ۔ انہاں آپݨی ڳالھ مہاڑ اچ آکھیےاساݙی جیڑھی اسلامی تعلیمات ہن اساݙے نبی کریم حضرت محمد مصطفیٰ صلی اللہ علیہ وآلہ وسلم ، ساݙے امام تے اولیا کرام جیڑھا درس ݙتے اتے ساݙا جیڑھا پراݨا ورثہ ہے ایں تے آگاہی ݙیوݨ دی لوڑھ اے۔ اڄ سوشل میڈیا فاصلے ودھا ݙتن، اڄ دی نینگر نسل موجودہ تے پچھلی نسل وچال ھک جیڑھی جڑت رہ ڳئی ہئی او ہݨ مُک ڳئی اے ۔ انہاں آکھیے ھک تریمت ای خاندان دی سربراہ بݨ تے آپݨے ٹٻر دی تربیت کریندی اے ، جݙاں تئیں کہیں کوں شعور نہ ہوسی انہاں کوں بنیادی ذمے واریاں دا پتہ نہ ہوسی او معاشرہ کݙاہیں وی ترقی آلے پاسے نی ونڄ سڳدا اتے اے ݙینھ مناوݨ دا مقصد ہی آگاہی ݙیوݨ اے جو ماں پیو آپدے بالیں نال جڑت ودھاون تاں جو معاشرے کوں مضبوط کیتا ونج سگے ۔
