ملتان۔19مئی(اے پی پی) کمشنرملتان ڈویژن انجینئر عامر خٹک آکھیے نویں نسل ساݙے ملک دا اثاثہ اے ،ملک دی ترقی سانڳے اساں ساریں کوں آپݨا مثبت کردار ادا کرݨا ہوسی۔ اے ڳالھ انہاں ایمرسن یونیورسٹی دے طلبا و طالبات دے وفد نال ملاقات اچ آکھی اے ۔انہاں آکھیے وطن عزیز دی سلامتی و بقا ساریں توں اہم اے ۔ پاکستان کوں اللہ تعالیٰ تا قیامت قائم و دائم رکھے۔انہاں آکھیے شہر دی تعمیر و ترقی، انفراسٹرکچر دی بہتری کیتے اقدامات کیتے ویندے پئن ۔ شہریاں دے مسئلے ترجیحی بنیاداں تے حل کیتے ویسن ۔ سوئی گیس، پی ٹی سی ایل واسا کوں سڑک دی تعمیر دے بعد بحالی دا ٹاسک ݙتے ۔ انہاں ݙسائے سکولاں اچ 100,واسادے65 اتے کارپوریشن دے56 واٹر فلٹریشن پلانٹس فعال ہن۔ شہر دے سارے 50 پارکاں اچ بہترین انتظامات کیتے ویندے پئن ، انہاں آکھیے جو تجاوزات مکاوݨ کیتے ساریں کوں آپݨا کردار ادا کرݨا ہوسی ۔ دکان دی حدود توں ٻہر کہیں کوں وی سامان رکھݨ دی اجازت نی ہوندی ۔شہر دی صفائی کیتے ویسٹ مینجمنٹ کمپنی کوں ٹاسک ݙتا ڳئے۔شہر دے داخلی خارجی رستیں دی تزئین و آرائش دا انتظام کیتا ویندا پئے ۔ ایں موقع تے کمشنر عامر خٹک توں طلباءو طالبات سوال وی کیتے ۔
