راجن پور۔ 16 جون (اے پی پی) راجن پور اچ انجاݨ مسلح بندیاں دی فائرنگ نال پولیس کانسٹیبل شہید تھی ڳیا۔ ملزم فائرنگ دے بعد ٻھجݨ اچ کامیاب تھی ڳے۔ جامپور شہر داجل روڈ تے پولیس اہلکار شکیل احمد تے انجاݨ بندیاں دی فائرنگ دی اطلاع تے پولیس تھاݨاں سٹی جامپور موقع تے پڄی اتے شکیل احمد کوں تحصیل ہیڈ کوارٹر ہسپتال جام پور چا ڳے جتھ او زخماں دی تاب نہ جھلیندیں ہوئیں شہید تھی ڳیا۔ واقعے دی اطلاع ملدیں ڈی پی او راجن پور کیپٹن (ر) دوست محمد موقع تے پڄ ڳے۔ شہید دے ٹبراں نال ملاقات کیتی اتے مجرماں کوں کیفر کردار تئیں پڄاوݨ دا یقین ݙوایا۔ ڈی پی او ”اے پی پی“ کوں ݙسیا جو ملزماں دی گرفتاری کیتے خصوصی ٹیماں ٻݨا ݙتیاں ڳن اتے جلدی انہاں کوں پکڑ ڳھنسوں۔
