ملتان۔ 24 جولائی (اے پی پی) نگران وزیراعلیٰ پنجاب سید محسن نقوی ہدایت کیتی اے جو کپاہ مقررہ نرخ 8500روپے مݨ توں گھٹ ریٹ تے نی وکݨی چاہیدی تے سارے کمشنرز مقررہ نرخ تے کپاہ دی وکامت یقینی بݨاون ۔اے ڳالھ انہاں دورہ ملتان دے موقع تے سرکٹ ہاؤس ملتان اچ ھک اجلاس دی صدارت کریندے ہوئیں آکھی اے ۔ اجلاس اچ کپاہ دی پیداوار تے زرعی دوائیں دی فراہمی یقینی بݨاوݨ دے حوالے نال اقدامات دا جائزہ ڳھدا ڳیا جݙاں جو ضیان پڄاوݨ آلے کیڑیں توں کپاہ کوں بچاوݨ کیتے حفاظتی اقدامات تے وی غور کیتا ڳئے ۔نگران وزیراعلی پنجاباچ 50 لکھ ایکڑ رقبے تے کپاہ رہاوݨ تے کاشتکاراں، محکمہ زراعت اتے انتظامیہ دیاں کوششاں دی تعریف کیتی ۔ انہاں آکھیے کاشتکاراں کوں انہاں دی محنت دا پورامعاوضہ ملݨا چاہیدے ۔کمشنر ،ڈپٹی کمشنر اتےمتعلقہ افسران فیلڈ دے دورے جاری رکھن ۔ ایں موقع تے سیکرٹری زراعت وزیراعلی کوں کپاہ دی موجودہ فصل بارے بریفنگ ݙتی ۔پاکستان کسان اتحاد دے صدرخالد محمود کھوکھر آکھیے وزیراعلیٰ پنجاب دے کپاہ دی ریکارڈ کاشت کیتے اقدامات قابل تحسین ہن۔ اجلاس اچ چیف سیکرٹری، انسپکٹر جنرل پولیس، ایڈیشنل چیف سیکرٹری جنوبی پنجاب، ایڈیشنل آئی جی جنوبی پنجاب،سیکرٹری زراعت، کمشنر ملتان ڈویژن، آر پی او ملتان،سیکرٹری زراعت جنوبی پنجاب، میاں نواز شریف یونیورسٹی آف ایگریکلچر ملتان دے پروفیسر ڈاکٹر شفقت سعید، ڈی جی پلانٹ پروٹیکشن کراچی اللہ ݙتہ عابد اتے متعلقہ حکام شرکت کیتی جݙاں جو صوبائی وزیر اطلااعات عامر میر، چیئرمین پلاننگ اینڈ ڈویلپمنٹ بورڈ، سیکرٹریز آبپاشی، لائیوسٹاک، خوراک، اطلاعات، خزانہ، سارے ڈویژنل کمشنرز و آر پی اوز، چیئرمین پنجاب انفارمیشن ٹیکنالوجی بورڈ، شاہد ستار، چیئرمین پاکستان کارپ پروڈکشن ایسوسی ایشن رؤف الرحمن، چیئرمین کارپ لائف پاکستان عاطف کمال، ماہر پیسٹی سائیڈ سعد اکبر، وائس چانسلر یونیورسٹی آف ایگریکلچر فیصل آباد اتے متعلقہ حکام ویڈیو لنک دے ذریعے شرکت کیتی ۔
