پٹرول 19.95 روپے ،ہائی سپیڈ ڈیزل دے نرخ اچ 19.90 روپے فی لیٹر ودھارا، فیصلہ عالمی مارکیٹ اچ ݙوہیں دے نرخاں اچ ودھارے پاروں کرݨا پئے، وزیر خزانہ

اسلام آباد۔1اگست  (اے پی پی) حکومت پٹرولیم مصنوعات دے نرخ ودھا ݙتن۔ پٹرول   19.95 روپے ،ہائی سپیڈ ڈیزل دے نرخ اچ 19.90 روپے فی لیٹر ودھا ݙتے ڳئن۔ نویں نرخاں دا اطلاق فوری ہوسی۔ منگل کوں میڈیا نال ڳالھ مہاڑ کریندیں ہوئیں وزیرخزانہ سینیٹرمحمداسحاق ڈارآکھیا جو گزریل 15 ݙینھ اچ عالمی منڈیاں اچ پٹرولیم مصنوعات دے نرخ ٻہوں ودھین۔ عالمی مارکیٹ اچ ہائی سپیڈ ڈیزل دے نرخ 16 جولائی کوں 96.26 ڈالرتوں ودھ تے31 جولائی کوں 111.46 ڈالرفی بیرل تھی ڳئے۔ اینویں خام تیل دے نرخ 16 جولائی کوں 89.14 ڈالرفی بیرل ہن جیڑھے 31 جولائی کوں 97.39 ڈالرفی بیرل تھی ڳئن۔