ملتان۔ 11 اگست(اے پی پی) کمشنرملتان ڈویژن انجینئر عامر خٹک آکھیے صوبے کوں ڈینگی توں پاک کرݨ حکومت پنجاب دا عزم اے ، ڈینگی کنٹرول ٹیماں فیلڈ اچ نظر آون،غلط رپورٹنگ برداشت نہ کریساں ،سرکاری دفتر اچ ڈینگی لاروا برآمد تھیوݨ تے سربراہ دےخلاف کارروائی کیتی ویسی ۔ اے ڳالھ انہاں انسداد ڈینگی مہم بارے اجلاس دی صدارت کریندے ہوئیں انسداد ڈینگی مہم دے اقدامات اتے آگاہی مہم دا تفصیلی جائزہ گھندے ہوئیں آکھی ۔ انہاں آکھیے اڄوکے موسم پاروں ڈینگی لاروا دی افزائش دا خطرہ ودھ ڳئے ۔ انہاں آکھیے ناقص کارکردگی دے حامل محکمیں دے خلاف سخت ایکشن ڳھدا ویسی ۔کمشنر نے ڈپٹی کمشنرز،محکمہ صحت کوں انسداد ڈینگی مہم دی کامیابی دا ٹاسک ݙیندے ہوئیں آکھیے ڈینگی کنٹرول اچ ملتان ڈویژن پورے صوبے اچ ٹاپ پوزیشن تے ہووݨا چاہیدے ،جدید اینڈرائیڈ سسٹم نال ڈینگی دے خلاف سرگر میاں کوں پورٹل تے اپ لوڈ کیتا ونڄے۔ ڈینگی لاروا ملݨ تے کمرشل و نجی عمارتاں کوں سربمہر کیتا ویسی ۔زیرتعمیر عمارتاں تے جوہڑاں دی خصوصی چیکنگ کیتی ویسی ۔ضلعی محکمے صفائی دے خصوصی اقدامات کرن۔انہاں مزید آکھیے ڈینگی پورٹل تے ملݨ آلیاں شکایتاں دا وختی ازالہ کیتا ونڄے سارے ہسپتالاں اچ ڈینگی دے علاج دی سہولت ݙتی ڳئی اے ۔ انہاں سرکاری محکمیں دی صفائی چیک کرݨ دی کمیٹی بݨاݙتی ۔ ایں موقع تے ڈینگی پروگرام دے کوآرڈینیٹر ڈاکٹرعطاالرحمن بریفنگ اچ کمشنر کوں ݙسائے جو ڈویژن اچ اڄوکے سال ہݨ تئیں ان ڈور 8337 جہیں تے آؤٹ ڈور سرویلنس دے دوران665 جہیں توں ڈینگی لاروابرآمد تھئے ۔انہاں آکھیے ھک ݙینھ اچ 209 استغاثہ،76 جہیں سربمہراتے 10 لوک گرفتار کیتے ڳئن۔ڈویژن اچ ڈینگی دے سارے مریض صحت یاب تھئن ۔
