قائداعظم سودھے عظیم رہنماواں دے ایں قیمتی تحفے تے ہمیشہ انہاں دے احسان مند رہسوں ،وزیر اعظم  شہباز شریف دی76 ویں یوم آزادی دے موقع تے قوم کوں مبارخ

اسلام آباد۔14اگست(اے پی پی) وزیر اعظم محمد شہباز شریف 76 ویں یوم آزادی دے موقع تے قوم کوں مبارخ ݙٰیندے ہوئیں آکھیے جو قائداعظم سودھے ٻئے عظیم رہنماواں ایں قیمتی تحفہ تے ہمیشہ انہاں دے احسان مند رہسوں ،پاکستان دا تصور عظیم ہئی ا،آزادی دا جذبہ پاکستانیاں کوں پیش آندے چیلنجز تے قابو پاوݨ تے ھک ایجھی قوم دی تشکیل کیتے کم کرݨ دی ترغیب ݙیندے جیڑھا جو انصاف، مساوات اتے ساریں کیتے خوشحالی دے اصولاں تے مبنی اے،یوم آزادی تے اساں آپݨے کشمیری بھراواں دی جدوجہد آزادی دی سیاسی،سفارتی اتے اخلاقی حمایت دا ھک واری ول اعادہ کریندوں ۔وزیر اعظم آفس میڈیا ونگ توں جاری بیان موجب وزیرِ اعظم شہباز شریف یومِ آزادی  تے آپݨے پیغام اچ آکھیے قوم اڄ پاکستان دی 76ویں آزادی دی سالگرہ منیندی پئی اے ۔ ایں موقع تے میں سمندر پار پاکستانیاں سودھے پوری قوم کوں دلوں مبارخ ݙیندان اے ݙینھ ساݙے دلاں اچ خاص جاہ رکھیندے ۔ کیوں جو ایں ݙینھ آزادی دی تاریخی جد و جہد ریاستِ پاکستان دے قیام تے مکی ہئی ۔ اڄ دے ݙینھ اساں انہاں مرداں تریمتاں تے ٻالاں کوں بھرپور خراجِ تحسین پیش کریندوں جیڑھے قائد اعظم دی متحرک قیادت اچ کٹھے تھئے تاں جو ایجھی سرزمین گھنݨ کیتے جدوجہد کرسڳن جیں کوں او آپݨا گھر آکھ سڳن ۔ وزیراعظم آکھیے ایں عمل اچ لوکاں حصولِ پاکستان دے عزم اتے لڳن دی عالیشان مثال قائم کیتی ہئی ۔ میں قائد اعظم اتے انہاں راہنماواں کوں وی خراج عقیدت پیش کرݨ چاہساں جنہاں دے بغیر پاکستان دے خواب کوں عملی جامہ پواوݨ ممکن کائناں ہئی ۔ پاکستان دے ایں قیمتی تحفے کیتے اساں انہاں عظیم رہنماواں دے ہمیشہ احسان مند رہسوں۔