قانون دی حکمرانی تے کوئی سمجھوتہ نہ کیتا ویسی ،ملکی تے غیر ملکی سطح تے کیتے ڳئے وعدے پورے کریسوں ، نگراں وزیراعظم انوار الحق کاکڑ

اسلام آباد۔18اگست  (اے پی پی) نگران وزیراعظم انوار الحق کاکڑ آکھیے قانون دی حکمرانی تے کوئی سمجھوتہ نہ کیتا ویسی ، پاکستان قدرتی وسائل توں مالا مال ملک اے، ٻاہرلی سرمایہ کاری  سہولت کونسل دے پلیٹ فارم توں مقررہ مدت اچ پاکستان دی ترقی دا منڈھ ٻدھݨ دی کوشش کریسوں ،  ملکی تے غیر ملکی سطح تے کیتے ڳئے وعدے پورے کریسوں ،کشمیر ھک پراݨہ مسئلہ اے تے اینکوں کہیں صورت اچ نظر انداز نی کیتا ونڄ سڳدا ، ریاست اقلیتاں کوں ضیان پڄاوݨ آلیں دے رلے کائنی ،اکثریت کوں اقلیت دا خیال رکھݨا ہوسی کابینہ اجلاس اچ ڳالھ مہاڑ کریندے ہوئیں نگران وزیراعظم انوار الحق کاکڑ نویں نگراں کابینہ  کوں مبارخ ݙیندے ہوئیں آکھیے جو اے ھک تجربہ کار تے بہترین ٹیم اے ۔ کابینہ اچ ملک دے قابل ترین لوک شامل ہن تے آپݨے  شعبہ جات اچ مہارت رکھیندن ۔ نگراں وزیراعظم آکھیے میکوں قابل ٹیم تے فخر اے اتے توقع اے جو ایں عبوری مدت اچ اساں  قوم دی بھرپور خدمت کریسوں ۔ بھاویں اساں کنے ملک دی خدمت کیتے کوئی زیادہ مینڈیٹ کائنی بلکہ ھک محدود ویلھا اے ، اساں کوشش کریسوں گزریل حکومتاں ملکی تے بین الاقوامی سطح تے مختلف فورمز تے جیڑھے وعدے کیتن انہاں کوں پورا کریسوں تے ایندے تسلسل اچ قانون تے آئین  اساکوں جیڑھی اجازت ݙیندے ایندے اچ رہ تے نویں اقدامات کریسوں ، بالخصوص گزریل حکومت دی طرفوں بݨائی ڳئی غیر ملکی سرمایہ کاری  سہولت کونسل دے پلیٹ فارم توں جیڑھی توقعات ہن او پوریاں تھیون ۔ پاکستان ھک زرعی ملک اے،جتھاں وݙے معدنی وسائل ہن ۔ بلوچستان قدرتی اتے معدنی وسائل توں مالا مال اے۔انہاں آکھیے ایس آئی ایف سی کوئی نواں تصور کائنی بلکہ پراݨا قومی خواب اے جیں تے ہݨ عملدرآمد کیتا ویندا پئے ۔ ویلھا آڳئے جو پاک آرمی سودھے سارے اداریں دے تعاون نال اساں معاونت، سہولت، حوصلے اتے ادراک توں ایں پراݨے خواب کوں پورا کروں ، اے کہیں ھک ادارے دا نی بلکہ 25 کروڑ عوام دی اجتماعی ملکیت اے۔ایندے اچ اساں سارے سانجھے طور تے کردار نبھیسوں ۔ انہاں آکھیے ایں منقسم ماحول اچ اساں کوشش کریسوں جو سیاست تے قانون اچ فرق رکھوں۔ اتھاں قانون دی حکمرانی اتے رُول آف آرڈر ہووے ۔اساں یقینی بݨیسوں جو رُول آف آرڈر تے کہیں طور تے سمجھوتہ نہ تھیوے جے کتھائیں انتشار ہووے تاں کوئی حکومتی نظام نی چل سڳدا اساکوں ایندی اہمیت دا پتہ اے۔ ایں تے کہیں طور تے سمجھوتہ نی تھی سڳدا ۔ انہاں آکھیے پاکستان سارے مذہب  دے حامل  لوکاں دا ملک اے ۔قائد اعظم 11 اگست کوں آپݨی مشہور تقریراچ آکھیا ہئی جو کہیں کوں وی ایندی شناخت دی بنیاد تے حقوق حاصل نہ ہوسن بلکہ بلا تفریق ساریں کوں اے حقوق حاصل ہوسن ۔  اساکوں آپݨے پاکستان دے خواب  دا ادراک کرݨا ہوسی ت اے ساݙی دھرتی دا خواب اے۔ قائداعظم اتے  اقبال دے وژن تے عمل کر تے پاکستان دی ترقی اچ کردار اداکریسن ۔انہاں آکھیے اساں قدامت  پسندرجحانات دی کہیں شکل دی سختی نال مذمت کریندوں ۔ معاشرے اچ مذہبی انتہا پسندی دی کوئی گنجائش کائن ۔ ایندی حوصلہ شکنی کیتی ویسی اینکوں قانون دے مطابق نبݨݨا اے ۔ انہاں آکھیے پاکستان کوں وݙے معاشی چیلنجز دا سامݨا اے تاں جو اساں قابل نگران ٹیم  دے تعاون نال مالیاتی  نظم و ضبط قائم کریسوں ۔اساکوں ٹیکس پیئر دے  پیسے دی اہمیت دااندازہ اے۔ انہاں آکھیے ساݙا اڄ دا اے اجلاس ، وسائل، سفر دی قیمت پاکستان دے عوام اداکریندن ۔ھک  دکاندار، ٹیچر،  قانون دان، سول سرونٹ  اے اساں کیتے کم کریندن تے اساں انہاں کوںسماجی خدمات ، ساز گارماحول ݙیوݨ دے ذمے وار ہیسے ۔نگران وزیراعظم آکھیے پاکستان مختلف مذہب اتے زباناں دا حامل ملک اے۔ اقلیتاں دا ایں ملک اچ مکمل تحفظ کیتا ویسی ۔ ریاست اقلیتاں کوں ضیان پڄاوݨ آلے عناصر نال کائنی ۔اکثریت کوں اقلیت دا خیال رکھݨا ہوسی۔ نگراں وزیر اعظم 9 مئی  دے واقعات تے ناپسندیدگی دااظہار کریندے ہوئیں آکھیے اساݙی ہماری فوجی تنصیبات تے حملہ ساݙے پورے نظام تے حملے دے مترادف اے۔ اساں نہ صرف ایندی مذمت کریندوں بلکہ ایندے ذمے واراں کوں قانون دی کچاری اچ گھن آسوں جیں وی قانون دی خلاف ورزی کیتی اے انہاں نال کہیں قسم دی رعایت نہ کیتی ویسی ۔