نگران حکومت آزادانہ اتے منصفانہ انتخابات کیتے الیکشن کمیشن دا ہتھ ونݙیسی، نگران وزیر اطلاعات مرتضیٰ سولنگی

اسلام آباد۔18اگست(اے پی پی):نگران وفاقی وزیر اطلاعات و نشریات مرتضیٰ سولنگی آکھیے جو نگران حکومت آزادانہ اتے منصفانہ انتخابات کیتے الیکشن کمیشن دا ہتھ ونݙیسی۔ اسلام آباد اچ نگران وزیراعظم انوار الحق کاکڑ دی اڳواݨی اچ تھیوݨ آلے نگران کابینہ دے پہلے اجلاس توں بعد میڈیا بریفنگ اچ انہاں آکھیا جو نگران کابینہ اپݨے حلف اتے آئین و قانون دے مطابق کم کریسی، چیف الیکشن کمشنر راجہ سکندر سلطان کوں آندے انتخابات کیتے تعاون اتے ضروری تقرر و تبادلیاں کیتے سفارشاں تے عمل درآمد سانڳے وفاقی کابینہ دے تعاون دا ݙسائے جو آزادانہ انتخابات یقینی ٻݨائے ونڄن۔ انہاں آکھیا جو پاکستان دے آئین دے مطابق ملک عوام دے منتخب نمائندے چلیسن اتے نگران حکومت آندے انتخابات تئیں ملکی معاملات ݙیکھسی، معاشی صورتحال پاروں حکومت سرکاری اخراجات اچ کمی دا فیصلہ کیتے، پٹرولیم مصنوعات عالمی مارکیٹ دے مطابق ݙیسوں، آئی ایم ایف معاہدے پاروں کہیں شے تے سبسڈی نہ ݙتی ویسی۔ انہاں آکھیا جو ریاست اقلیتاں نال کھڑی اے، کہیں کوں مذہب، رنگ یا ذات دے ناں تے نشانہ ٻݨاوݨ دی اجازت نا ݙتی ویسی، ساریاں دے حقوق ہکو سویں ہین۔ نگران وفاقی وزیر اطلاعات آکھیا جو پی ٹی آئی قیادت دے خلاف قانونی مقدمات عدالت اچ زیر سماعت ہین، حکومت ایندے اچ کوئی مداخلت نا کریسی، ملک اچ اظہار رائے دی آزادی کیتے اقدامات کیتے ویسن۔