اسلام آباد۔6ستمبر(اے پی پی) نگران وزیرداخلہ سرفراز احمد بگٹی آکھیے یوم دفاع اساکوں ساݙی مسلح فوج دی بے مثال جرات اتے بہادری دی یاد ݙویندے ، وطن دی خاطر جان ݙیوݨ آلے شہیداں کوں سلام پیش کریندوں۔ وزارت داخلہ توں جاری بیان موجب اے ڳالھ انہاں یوم دفاع تے قوم دے ناویں آپݨے سنھیے اچ آکھی اے ۔ نگران وزیر داخلہ آکھیے یوم دفاع اساکوں ساݙی مسلح افواج دی بے مثال جرات تے بہادری دی یاد ݙویندے ۔ وطن دے بہادر سپوتاں دشمن دے خلاف بغیر کہیں ݙر دے لڑدے ہوئیں تاریخ دا روشن باب رقم کیتا ۔ انہاں آکھیے دفاع وطن سانڳے جاناں ݙیوݨ آلے شہیداں کوں سلام پیش کریندوں ۔ وطن عزیز کوں اڄ انتہا پسندی ،دہشت گردی جیہے چیلنج دا سامݨا اے۔ پاکستان دی مسلح افواج ہر طرح دے اندرلے تے ٻاہرلے خطریں دے خلاف دفاع وطن سانڳے پرعزم ہن۔ سرفراز احمد بگٹی آکھیے ملکی سالمیت اتے ترقی دے خلاف ناپاک عزائم ناکام بݨاوݨ سانڳے قوم اپݨی بہادر فوج دے رلے کھڑی اے۔ پاکستان کنے میلی اکھ ݙیکھݨ آلیں دے عزائم مٹی اچ رلا ݙیسوں۔
