ملتان۔ 12 ستمبر (اے پی پی) نگران وزیراعلیٰ پنجاب محسن نقوی ملتان اچ سنوار رات کوں رات آپݨی کابینہ دے رَلے نشتر ہسپتال ملتان دا دورہ کیتا۔ ہسپتال اچ دوائیں ہن نہ انجکشن اتے سرنجاں، مریضاں اتے تیمادراں طبی سہولتاں نہ ہووݨ تے شکایتاں دے انبار لا ݙتے۔ نشترہسپتال دے کئی وارڈز اچ اے سی بند ہن، پارکنگ اچ اوور چارجنگ دی شکایات ہئی۔ ایں صورتحال تے نگران وزیر اعلی محسن نقوی کاوڑ کریندیں ہوئیں ایم ایس راؤ امجد کوں فوری بدل ݙتا۔ ٹیسٹ ٻاہر توں کراوݨ دی شکایت اتے مریضاں نال غلط بیانی تے لیب انچارج دے خلاف وی کاروائی کیتی ڳئی اتے پارکنگ اوورچارجنگ تے ٹھیکیدار دے خلاف ایف آئی آر درج کرݨ دا حکم ݙتا۔ وزیراعلی محسن نقوی ایمرجنسی، لیبارٹری، سرجیکل، نیورو،میڈیکل، فارمیسی، آئی وارڈ اتے ٻئے شعبیاں دا معائنہ کیتا۔ مریضاں اتے تیماداراں نال ملاقات کیتی۔
