اسلام آباد۔13ستمبر (اے پی پی) پاکستان اچ چین دے نویں سفیر جیانگ زیدونگ ݙوہیں برادر ملکاں وچال سدابہار دوستی کوں ودھاوݨ کیتے کوششاں کرݨ دا عزم کریندیں ہوئیں آکھیا جو چین مسلسل اٹھ سالیں توں پاکستان دا ساریاں توں وݙا سانجھے دار اے، چین دی ترقی بلاشبہ پاک چین تعاون دے نویں موقع ٻݨیسی۔ بیلٹ اینڈ روڈ انیشی ایٹو اتے چین پاکستان اقتصادی راہداری (سی پیک) دی ݙاہویں سالڳنڈھ دے موقع تے آپݨے سنیھے اچ انہاں آکھیا جو پاکستان اتے چین پہاڑاں اتے دریاواں نال جڑین اتے سفارتی تعلقات دے بعد توں گزریل بہتر سالیں اچ ݙوہیں ملکاں وچال دوستی رہی اے۔ چینی سفیر آکھیا جو کوئی فرق نی پووݨا چاہیدا جو بین الاقوامی حالات کینویں بدلن چین اتے پاکستان ہمیشہ ݙکھ تکلیف اچ نال کھڑیے رہین۔ ݙوہیں ملکاں ہک ݙوجھے کوں تعاون کیتے اتے آہنی دوستی ٻݨائی اے۔ چینی سفیر یاد ݙوایا جو اپریل 2015 اچ چین دے صدر شی جن پنگ پاکستان دا تاریخی دورہ کیتا جئیں اچ فریقین پاک چین ݙوپاسہ تعلقات کوں سٹریجک تعاون تے سانجھے داری نال ودھایا اتے ݙوپاسہ تعلقات دی ترقی اچ ہک نواں باب شروع تھیے۔ انہاں آکھیا جو ایندے بعد صدر شی جن پنگ کئی واری پاکستانی رہنماواں نال ملاقاتاں کیتی اتے فریق اہم اتفاق رائے نتے پڄین جو ݙوپاسہ تعلقات دی ترقی کیتے بنیادی اصول اتے ایکشن گائیڈ لائنز ݙیندے۔ جیانگ زیدونگ آکھیا جو چین اتے پاکستان دے تعلقات اعلیٰ سطح دے آپریشنز کوں برقرار رکھے ہوئن ۔صدر شی جن پنگ سی پیک دی 10 ویں سالگنڈھ دا سنیھا ٻھیجے اتے آپݨے خصوصی نمائندے چین دی سٹیٹ کونسل دے نائب وزیراعظم ہی لیفنگ کوں جشن دی تقریبات اچ شرکت کیتے پاکستان دا دورہ کرݨ کیتے ٻھیجا جیڑھا جو اساݙے رہنماواں ولوں پاک چین تعلقات کوں ݙتی ڳئی اہمیت کوں نشابر کریندے۔ چین دے سفیر آکھیا جو صدر شی جن پنگ ولوں تجویز کیتے ڳئے گلوبل ڈویلپمنٹ انیشی ایٹو، گلوبل سکیورٹی انیشی ایٹو اتے گلوبل سولائزیشن انیشی ایٹو کوں پاکستان اچ مثبت ردعمل ملیے۔ انہاں آکھیا جو رہنماواں دی مضبوط رہنمائی پاک چین تعلقات دی ترقی دی سدھ اتے اڳوں ودھݨ کیتے راہ سوکھا کیتے۔ انہاں آکھیا جو ݙوہیں ملک سانجھے طور سی پیک کوں ترقی دی راہداری، روزگار ودھاوݨ آلی راہداری، جدت دی راہدری، گرین کوریڈور اتے کھلی راہداری ٻݨاوݨ اتے سی پیک کوں اعلیٰ معیار دی ترقی نال اڳوں ودھاوݨ کیتے پرعزم ہن۔ چین اتے پاکستان وچال فوجی تبادلیاں اتے تعاون دا ذکر کریندیں ہوئیں انہاں آکھیا جو اے سلسلہ مسلسل ڳھاٹا تھیندا پئے کیونجو ݙوہیں فوجاں دے رہنماواں باقاعدگی نال تبادلے اتے دوریاں دی چنڳی رفتار رکھی اے۔ انہاں آکھیا جو ایں سال چیئرمین جوائنٹ چیفس آف سٹاف کمیٹی اتے چیف آف آرمی سٹاف سمیت پاکستانی فوج دے سینئر رہنماواں چین دا مسلسل دورہ کیتے۔ انہاں آکھیا جو علماء، میڈیا پروفیشنلز، مذہبی نمائندے اتے ٻئے گروپاں ولوں دورے دا تبادلہ ہک دے بعد ہک تھیے۔ سفیر آکھیا جو گندھارا آرٹ نمائش بیجنگ دے پیلس میوزیم اچ کامیابی نال تھئی اے جئیں نال ݙوہیں ملکاں دی عوام وچال رابطے، سیاحتی تعاون اتے ثقافتی تبادلیاں کوں نویں تحریک ملی اے۔ انہاں آکھیا جو صدر شی جن پنگ اتے پاکستانی رہنماواں وچال تھیوݨ آلے اہم اتفاق رائے کوں رہنمااصول دے طور تے نافذ کریندیں ہوئیں نویں دور اچ سانجھے مستقبل نال چین پاکستان کمیونٹی دی تعمیر کوں مرکزی لائن دے طور اتے سی پیک دی اعلیٰ معیار دی ترقی دے پلیٹ فارم کوں چین پاکستان ہمہ موسمی تزویراتی تعاون کوں مسلسل مضبوط، ڳھاٹا اتے ودھاوݨ، ہک صدی اچ نطر نہ آوݨ آلی تبدیلیاں دے خلاف اساݙے سانجھے مفادارت دی حفاظت اتے ݙوہیں ملک اتے ݙوہیں عوام کوں بہتر طور فائدہ پجاوݨ کیتے چین اتے پاکستان اچ زندگی دے سارے شعبیاں توں تعلق رکھݨ آلے دوستاں نال رل تے کم کرݨ کیتے تیار ہیسے۔
