اسلام آباد۔19ستمبر(اے پی پی سرائیکی سروس) “جنسی بنیاد تے تشدد اتے ٻالاں دی شادیاں دی ذمہ وارانہ رپورٹنگ اتے نمائندگی تے قومی میڈیا فیلو شپ” دی ݙاہ ݙینھ دی ورکشاپ چھݨ چھݨ کوں کراچی اچ مُک ڳئی۔ فیلوشپ نیشنل کمیشن آن دی سٹیٹس آف ویمن (NCSW) دا فلیگ شپ میڈیا اقدام اے اتے اینکوں اقوام متحدہ دے پاپولیشن فنڈ (UNFPA) اتے سینٹر فار ایکسیلنس ان جرنلزم (CEJ) IBA دی حمایت حاصل اے۔ورکشاپ اچ پورے ملک توں جی بی وی اتے بالاں دی شادی دے مسئلیاں تے رپورٹنگ کرݨ آلے 40 صحافی شریک تھیے۔ ورکشاپ اچ ملک دے سارے صوبیاں دی نمائندگی ہئی۔ صحافی انگریزی، اردو اتے علاقائی میڈیا اتے پرنٹ، ریڈیو، ٹی وی اتے ڈیجیٹل پلیٹ فارم توں آئے ہن۔ شرکاء کوں جی بی وی اتے بلپݨ دی شادی دے مسئلیاں بارے ݙسیا ڳیا اتے ٹرینرز ایں ڳالھ تے ڳالھ مہاڑ کیتی جو کینویں حساسیت اتے ذمہ واری نال انہاں علاقیاں بارے رپورٹنگ کیتی ونڄے۔ شرکاء کوں موبائل جرنلزم، ڈیٹا جرنلزم اتے ڈیجیٹل جرنلزم دی مہارتاں سکھائی ڳئی۔این سی ایس ڈبلیو 2022 اچ جی بی وی اتے چائلڈ میرج تے پہلی نیشنل میڈیا فیلوشپ شروع کیتی جیڑھی جو کامیابی نال 162 جی بی وی اتے بالاں دی شادی دی کہانیاں دے نال نال میڈیم اچ شائع تھئی۔ اے اقدام ایندا ݙوجھا گروہ اے۔
