سرائیکی زبان دا 1994 اچ اساں پہلا سافٹ ویئر تیار کروایا ہئی،سرائیکی رسالہ ” پارت” آندے مہینے نواں ایڈیشن چھپ ویسی ، اخبار بینی دے قومی ڈینھ تے سرائیکی زبان و ادب دے اہم ناں سینئر صحافی ارشاد امین دی اے پی پی نال گالھ مہاڑ

اسلام آباد۔25ستمبر  (اے پی پی سرائیکی سروس) سرائیکی زبان دا 1994 اچ اساں پہلا سافٹ ویئر تیار کروایا ہئی،سرائیکی رسالہ ” پارت” آندے مہینے نواں ایڈیشن چھپ ویسی۔ اے ڳالھیں اخبار بینی دے قومی ڈینھ تے سرائیکی زبان و ادب دے اہم ناں سینئر صحافی ارشاد امین دی اے پی پی سرائیکی سروس نال گالھ مہاڑ کریندیں ہوئیں آکھی۔ ایں موقع تے انہاں آکھیا جو ساریاں توں پہلے انہاں نواں سرائیکی ادب چھاپیا، میں عمر علی خان بلوچ توں “سرائیکی ادب”رسالہ ڳھدا، ݙو مہینے چھپیا اوندے بعد اساں اوندا ناں “سنگت” رکھ ݙتاہئی۔ انہاں آکھیا جو اوندے بعد اساں ملتان توں روزنامہ سڄاک شروع کیتا، اوندے بعد ول او کافی عرصہ چھپدا رہ ڳیا، ہݨ میں “پارت” سرائیکی رسالہ  چھپیندا پئیاں، کورونا دے آوݨ پاروں اے سلسلہ رک ڳیا ہئی ۔ہݨ آندے مہینے سرائیکی رسالہ”پارت” پنڄ سو صفحیاں دا چھاپیا ویندا پئے۔انہاں آکھیا جو ٻھانویں جو ہݨ اساں اخبار توں الیکٹرانک میڈیا اتے ڈیجیٹل میڈیا دے عہد اچ آڳیوں وت وی اخبار دی اہمیت اتے ڈھیر مد تئیں رہݨ آلے اثرات توں انکار نی کیتا ونڄ سڳدا۔