بغداد ۔27ستمبر (اے پی پی) عراق دے صوبے شمالی نینویٰ دے ضلع ہمدانیہ اچ شادی دی ہک تقریب اچ ٻھاہ لڳݨ پاروں ڳھوٹ کنوار سودھے 100 توں ودھ بندے جاں بحق اتے 150 زخمی تھی ڳئے۔ برطانوی ذرائع ابلاغ موجب نینویٰ دے ڈپٹی گورنر حسن العلق ݙسیا جو 113 بندیاں دی موت دی تصدیق تھی ڳئی اے۔ سرکاری میڈیا اموات دی تعداد سو اتے زخمیاں دی تعداد 150 ݙسائی اے۔ سرکاری میڈیا موجب مقامی شہری دفاع دا آکھݨ اے جو تقریب اچ جشن وچال لڳݨ آلی ٻھاہ پاروں ایونٹ ہال اچ ٻھاہ لڳ ڳئی۔ ابتدائی اطلاع موجب ٻھاہ لڳݨ پاروں شادی ہال دی عمارت ملبے دا ڈھیر ٻݨ ڳئی۔ مقامی میڈیا موجب ہلاک تھیوݨ آلیاں اچ ڳھوٹ اتے کنوار وی شامل ہن۔ علاقے دے گورنر ݙسیا جو زخمیاں کوں نینویٰ دے مختلف ہسپتالاں اچ پڄا ݙتا ڳئے۔ حادثے دے بعد ہمدانیہ دے مرکزی ہسپتال اچ درجناں بندے زخمیاں کیتے خون دا عطیہ ݙیوݨ پڄ ڳئن۔
