اسلام آباد۔12اکتوبر(اے پی پی) جڳ مشہور سرائیکی گلوکار شرافت علی خان بلوچ اتے انہاں دے بھرا انوار علی خان بلوچ سودھے ست بندے کار حادثے اچ جاں بحق تھی ڳئن ۔ ریسکیو ذرائع موجب انہاں دی ڳاݙی نہر اچ ڈھݨ پاروں شرافت علی خان بلوچ سودھے 7 لوکاں دیاں لاشاں نہر اچوں کڈھ ڳھدیاں ڳئن۔ شرافت علی خان بلوچ دی گاݙی اوں ویلھے نہر اچ ڈھہہ ڳئی جݙاں او رات تقریبا ݙو وڄے میانوالی دے نیڑے علاقے پکہ گھنجیرہ آلا توں شادی دا پروگرام کرتے واپس گھر آندے پئے ہن ۔شرافت علی خان بلوچ سرائیکی اچ سیکنڑاں مشہور ڳاوݨ ڳا تے لوکاں دے دل موہ ڳھدے جیڑھے ٻہوں مقبول تھئے۔ جیں اچ انہاں دے مشہور ڳاوݨ “ارمان تاں لڳدے، افسوس تاں لڳدے” ، جیہے سینکڑاں ڳاوݨ کوں آپݨی آواز نال لازوال بݨا ݙیوݨ آلے گلوکار شرافت علی خان بلوچ، اپݨے مداحواں دے دلاں اچ ہمیشہ زندہ رہسن۔شرافت علی بلوچ دی وفات تے پورا وسیب ارمانی اے۔
