مقبوضہ بیت المقدس ۔12اکتوبر(اے پی پی) فلسطینی وزارت صحت اعلان کیتے جو غزہ دی پٹی تے اسرائیلی جارحیت دے نتیجے اچ ہݨ تئیں 326 ٻال 171تریمتاں سودھے 1100 فلسطینی شہریاں دی شہادت دی تصدیق کیتی ڳئی اے ۔ فلسطینی خبررساں ادارے موجب فلسطینی وزارت صحت ھک بیان اچ ݙسائے جو طوفان الاقصیٰ آپریشن اچ زخمیاں دی تعداد 5339 تئیں پڄ ڳئی اے ۔انہاں ݙسایا پیشہ وارانہ ذمہ واریاں پوریاں کرݨ ویلھے اسرائیل دی بمباری توں 8 صحافی شہید تے 20 زخمی تھئن۔انہاں مزید ݙسائے جو فلسطینیاں دی کاررروائیاں اچ 1300 یہودی ہلاک اتے 2900 توں ودھ زخمی تھی چکئن اتے زخمیاں اچ سیکڑاں شدید زخمی اتے زندگی موت دی کشمکش اچ ݙسائے ویندن ۔وزارت صحت چتاوݨی ݙتی اے جو اسرائیلی جارحیت دی شدت توں ہسپتالاں دی اوکھ ودھ ڳئی اے کیوں جو ہسپتال اسرائیلی محاصرے دے نتیجے اچ اہم دوائیں ، طبی استعمال دیاں چیزاں تے ایندھن دی گھٹکی دا شکار ہن۔
