غزہ۔13اکتوبر (اے پی پی) اسرائیل دا 11 لکھ فلسطینیاں کوں چووی گھنٹے اندر غزہ دا شمالی حصہ چھوڑݨ دا الٹی میٹم ݙے ݙتے۔ ݙوجھے پاسوں اقوام متحدہ ایجھے کہیں وی کم کوں تباہ کن قرار ݙیندیں ہوئیں اسرائیل توں ایں بارے جاری کیتے ڳئے فوجی حکم واپسی ڳھنݨ دا مطالبہ کیتے۔ امریکی قیادت مغربی ملک دے دفاعی اتحاد نیٹو اسرائیل کوں فوجی امداد دی فراہمی شروع کر ݙتی اے۔ برطانوی نشریاتی ادارے دی رپورٹ اچ اقوام متحدہ دے ترجمان بارے ݙسیا ڳئیا جو اسرائیلی فوج اقوام متحدہ کوں آکھیاجو وادی غزہ دے شمال اچ رہݨ آلے ہر بندے کوں اگلے چووی گھنٹیاں اچ جنوبی غزہ منتقل تھیوݨا چاہیدے۔ اقوام متحدہ آکھیا جو اے تعداد تقریباً 11 لکھ فلسطینیاں تے مشتمل اے جیڑحی جو پوری غزہ پٹی دی آبادی دا ادھ اے۔ متاثرہ علاقے اچ گنجان آباد غزہ سٹی وی شامل اے۔ اسرائیلی فوج ولوں اے الرٹ غزہ اتے مقبوضہ بیت المقدس دے مقامی ویلھے رات 11 وڄے توں ٹھیک پہلے ݙتا ڳئیا ہئی۔
