ملتان۔28 نومبر(اے پی پی) ذوالفقار علی بھٹو شہید قومی کانفرنس دے شرکا پاکستان پیپلزپارٹی دے بانی شہید ذوالفقار علی بھٹو دیاں ملک و قوم کیتے خدمات کوں خراج عقیدت پیش کریندے آکھیے جو ملک اچ 1973 دے آئین دا کریڈٹ پیپلزپارٹی اتے شہید ذوالفقار علی بھٹو دا اے، آئین تے چل تے ہی جمہوری اداریاں کوں تکڑا کیتا ونڄ سڳدے۔ گولڈن جوبلی آئین پاکستان 1973 سانڳے ملتان اچ ” ذوالفقار علی بھٹو شہید قومی کانفرنس” تھئی جیندے مہمانان خصوصی علی موسیٰ گیلانی، علی حیدر گیلانی، سابق صوبائی وزیر و سینئر نائب صدر پیپلز پارٹی پنجاب آصف خان ہن۔ کانفرنس دے شرکا حبیب اللہ شاکر ایڈووکیٹ سپریم کورٹ سابق جسٹس ہائی کورٹ لاہور، پروفیسر فرخ ارسلان صدیقی، معروف صحافی، دانشور اتے محقق ڈاکٹر سعدیہ کمال، ڈاکٹرااشو لعل، لیاقت جعفری اتے ٻنھاں خطاب کیتے۔ مقررین دا آکھݨ ہا جو عوام ہر صورت پاکستان پیپلز پارٹی دے نال کھڑن، 1973 اچ ٻݨائے ڳئے آئین دا کریڈٹ شہید ذوالفقار علی بھٹو سابق وزیراعظم کوں ویندے جئیں آئین اچ انساناں دے بنیادی حقوق اتے مستقبل دا تفصیل نال تعین کیتے خاص کر آٹیکل 25 ہر کہیں نال برابری سکھیندے۔ کانفرنس اچ سابق کسٹم آفیسر مسعود عزیز، سرائیکی پارٹی دے صدر اللہ نواز وینس، شاکر حسین شاکر، رضی الدین رضی، خالد ظفر وینس، سجاد ہراج، فیاض بھٹہ اتے ٻنھاں وی خطاب کیتے۔
