مظفرگڑھ اچ زمینداراں دا گھر اچ کم کرݨ توں انکار تے مزدور اتے اوندی ذال تے تشدد، ڈی پی او دا نوٹس، ملزمان گرفتار

مظفرگڑھ۔ 03 دسمبر (اے پی پی) مظفرگڑھ  دی تحصیل جتوئی دے تھاݨاں بیٹ میر ہزار دی حدود اچ مزور اتے اوندی ذال تے زمینداراں دے تشدد تے ڈی پی او مظفرگڑھ سید حسنین حیدر نوٹس ڳھن ڳھدا اتے پولیس سنگین دفعات دے تحت مقدمہ درج کر تے چار ملزماں کوں گرفتار کر ڳھدے۔ پولیس دے ذرائع موجب تھاݨاں بیٹ میر ہزار دی حدود اچ زمیندار گھر اچ کم کرݨ توں انکار تے غریب مزدور تے تشدد کیتا اتے اوندا کن کپ ݙتا۔  غریب ہمسائے مزدور ندیم ولد نبی بخش  کوں ذال نوشین بی بی دے رلے آپݨے گھر اچ کم نہ کرݨ دی کاوڑ تے انہاں تے تشدد کیتا۔ زخمی مزدور ندیم کوں  تشویشناک حالت اچ تحصیل ہیڈکوارٹر ہسپتال جتوئی پڄا ݙتا ڳئے۔ ڈی پی او دا واقعہ دا نوٹس ڳھنݨ تے پولیس تھاݨاں بیٹ میر ہزار ملزماں دے خلاف سنگین دفعات دے تحت مقدمہ درج کر تے چار ملزماں کوں گرفتار کر ڳھدے۔ ڈی پی او دی ہدایت تے ایس ڈی پی او جتوئی مقدمہ دی تفتیش دی نگرانی کریسن۔