بہاولپور ، چڑیا گھر اچ شیر ہک شہری کوں چیرپھاڑ تے ہلاک کر ݙتا، انکوائری کمیٹی ٻݨا ݙتی ڳئی اے ،ڈپٹی کمشنر

بہاول پور ۔ 06دسمبر (اے پی پی) شیرباغ بہاولپور دے چڑیا گھر اچ شیر ہک شہری کوں چیرپھاڑ تے ہلاک کر ݙتے۔ اطلاع موجب چڑیا گھر دا عملہ سویلے شیراں دے پنجرے دی صفائی کیتے پڄیا تاں شیر انسانی جسم کوں چیڑ پھاڑ کیتا ہئیا ہئی جئیں تے سارے افسراں کوں اطلاع ݙتی ڳئی اتے فوری لاش کوں کݙھیا ڳئیا۔ شیر دا شکار تھیوݨ آلے بندے دی سنجاݨ اجاں تئیں نی تھئی۔ ڈپٹی کمشنر  بہاولپور اتے ٻئے افسر وی موقع تے پڄ ڳئے۔ ڈپٹی کمشنر بہاولپور میڈیا نال ڳالھ مہاڑ کریندیں ہوئیں ݙسیا جو اطلاع موجب اے ہک نشئی تھی سڳدے جیڑھا جو کہیں طریقے نال چڑیا گھر آئے اتے حادثے دا شکار تھی ڳئے۔ انہاں آکھیاجو چڑیا گھر دے عملے دی گنتری کیتی ڳئی اے اتے عملہ پورا اے۔ انہاں آکھیا جو ایں بارے انکوائری کمیٹی ٻݨا ݙتی ڳئی اے اتے ایں پورے واقعے دی تحقیقات کر تے چڑیا گھر دے آفیسرزآفیشلزدی نااہلی، غیرذمہ دارانہ رویہ اتےسیکورٹی لیپس کوں ݙیکھسی۔ جیڑھا وی ایں واقعے اچ قصور وار ہوسی اوندے خلاف سخت کاروائی کیتی ویسی۔