اسلام آباد۔18دسمبر(اے پی پی، ڈاکٹر سعدیہ کمال) سرائیکی اڳواݨ، سوجھواݨ سینئر صحافی ارشاد امین دی یاد وچ سرائیکی عوامی سنگت، سرائیکی عوامی تریمت تحریک اتے کراچی آرٹس کونسل دی اہر نال مُکاݨی کٹھ تھیا. ایں کٹھ ءِچ نامور صحافی، دانشور، ادیب نذیر لغاری، انور سن رائے، مشتاق فریدی، سینئرصحافی وارث رضا،صحافی نواز طاہر، صحافی خورشید عباسی، بلوچ رہنما رؤف ساسولی، سربراہ سرائیکی عوامی تریمت تحریک ادی عابدہ بتول، ادی نتاشا ارشاد امین، ادی سعدیہ شکیل، ادی نینا، ریٹائرڈ کرنل جبار عباسی، حمید علی، راشد عزیز بھٹہ، خورشید پہوڑ، بلال پہوڑ، اطہر ماڑھا،طارق محمود شفقت بخاری،ظہور ملک، عبدالخاق اچھا، فرہاد فریدی خطاب کیتا. مشور سرائیکی شاعر مدثر بھارا، اسحاق دانش آپݨا کلام اتے خلیل بلوچ، ملک عاقل ماچھی قومی گیت پیش کیتے. کٹھ ءچ صحافی آغا خالد، شیخ اسلم، سلطان لاشاری، ڈرامہ لکھاری خادم حسین اچوی،رشید جراݨی، خورشید انجم، عابد خان، ملک ریاض، ظفراقبال گوپانگ، ڄام ارشاد لاڑ تے صحافیں،دانشوریں وکیلیں، سندھی سرائیکی قوم پرستیں اتے عوام دی ڈھڳ تعداد وچ شریک تھئے. عظیم دھرتی واس ارشاد امین دی سرائیکی وسیب اتے قوم کیتےاݨ کُھٹ خدمات کوں خراج پیش کریندیں مقررین عہد کیتا جو اساں ادا ارشاد امین دے قومی تحریکی مشن کوں ٹوری رکھسوں تے منزل دے حصول تئیں ٻاݨ مریسوں، ترلہ کریسوں. مقررین دا آکھیا ارشاد امین دیاں ادبی، سیاسی، سماجی، ثقافتی خدمات اڄوکی اتے آمدݨ نسل کیتے سوجھل لاٹ ءن. اساں اُنہاں دے وچھوڑے کوں اپݨی طاقت بݨا وسیب دے حق سانگے جدوجہد کوں تیز کریسوں. ادا ارشاد امین دی دھی راݨی ادی نتاشا امین آپݨیے بابا سئیں دیے ادبی تحریکی پندھ کوں جاری رکھݨ دا اعلان کیتا.ایں موقعے تے ادا ارشاد امین دی بخشش کیتے دعا کیتی گئی. مکاݨی کٹھ دا اختتام مشور سرائیکی شاعر اخلاق مزاری دے ایں شعر نال کیتا ڳیا.
دیگر ویلھے ٹالھیں اُتے چڑیاں شور مچاون
سِجھ ابھرے تاں ویڑھے اندر مونجھاں بھیرمی ڳاون
