اسلام آباد۔22جنوری (اے پی پی) معروف شاعر تے لکھاری رفعت عباس دا نواں ناول “نیلیاں سلہاں پچھوں” چھپ گئے ۔:جیندے بارے ادیب ڈاکٹر عابد رونگھا تبصرہ کریندے لکھے جو رفعت عباس دا ناول “نیلیاں سلہاں پچھوں” خاب تھیوری دے مغربی تصور توں ودھ وسیع تصور ڈیندا اے ۔سگمنڈ فرائیڈ خاب کوں ہک بامعنی عبارت نال جڑیندے پر تے نال ای او جنس تے ناکام آرزواں دے نال جڑ تے ڈیکھدا رہیے جڈاں جو ایں ناول اچ موجود باب”ہک خاب جتنی جاہ” دے موجب خاب تاں مقامی بندے دی کارگاہ اے جتھاں او مکالماتی سرگرمی توں گزردے جیندے نال اوکارپوریٹ کلچر کوں پلٹاونڑ داکم کر سگدا اے ،کیوں جو او خاب دے عمل توں گزرے بغیر مقامی بندہ آپدے دور پرے ہوونڑ توں نی نکل سگدا ۔ خاب اے جیڑھا مقامی بندے کوں ہزار سال توں کلہیپے اچوں کڈھ سگدے ایں سانگے حاشیائ آدمی دا خاب اوندی طاقت بنڑ ویندا اے جیویں رفعت عباس ناول اچ لکھے جو خاب کہیں وی مقامی آدمی دی طاقت ہوندن۔انھاں دا بیا آکھنڑ ہا جو سرکاری لغت اچ خاب دی تعبیر سرمایہ دارانہ نفسیات توں بھری ہوئی اےجیڑھی انسان کوں سرمایہ دارانہ عقل توں باہر نکلنڑ نی ڈیندی نہیں ۔سرمایہ دار کڈائیں وی نی چاہندا جو آدمی آپدے خاب ڈیکھے اتے خاباں کوں عملی شکل ڈیونڑ سانگے پورا کارپوریٹ کلچر ترتیب ڈتا ویندا اے۔کارپوریٹ کلچر جیں انسان کوں مافوق الفطرت یا روبوٹک انسان بننڑن دا خاب ڈکھایا اے جڈاں جو مقامی آدمی دیوتا تے سورما یا روبوٹک انسان بننڑن دا خاب نی ڈیکھدا اوندے کیتے مستقبل دا انسان وی عام ای آدمی ہوندے ،جیندی دلیل رفعت عباس دا پہلا ناول “لونڑ دا جیون گھر ” اے جیندے اچ ناول دے کردار لونڑکا کوں سورما یادیوتا نی بنڑن ڈتا گیاجڈاں جو اوں کوں عام آدمی ای رکھا گیا اے
