ملتان۔ 01 فروری (اے پی پی) معروف ماہر تعلیم اتے مقتدرہ قومی زبان دے سابق سربراہ ڈاکٹرانواراحمد نامورسرائیکی ادیب، دانشور،محقق اتے ماہرقانون اسلم رسول پوری دے انتقال تے ݙکھ تے افسوس کیتے۔ انہاں آپݨے تعزیتی بیان اچ آکھیا جو انہاں رسول پور سویں پرے دے علاقے کوں پورے جڳ اچ سنجاݨ کرائی اے۔ اے ہک ریکارڈ ہئی جو انہاں رسول پور دے ہر بندے کوں خواندہ ٻݨا ݙتا۔ نامور سرائیکی دانشوراتے کالم نگار ظہوراحمد دھریجہ آکھیا جو اسلم رسول پوری ہک شخص نئی ہک عہد دا ناں ہئی انہاں کوں خدمات کوں کݙاہیں نی وساریا ونڄ سڳدا۔ اسلم رسول پوری یکم فروری منگل کوں83سال دی عمراچ انتقال کر ڳئے ہن۔ اسلم رسول پوری 1941 اچ جام پور اچ ڄمیے ہن۔ جام پور دے ہائی سکول توں میٹرک دے بعد اُنہاں مظفر گڑھ توں جے وی دا امتحان پاس کیتا، بھکر توں 1962 اچ پڑھاوݨ شروع کیتا۔ انہاں 1970 دے عشرے اچ سرائیکی ادبی تنقید لکھݨ شروع کیتی۔ ۔”سرائیکی زبان، اوندا رسم الخط تے آوازاں “ اچ پہلی واری انہاں سرائیکی صوتیات دا نظام وضع کی اتے ݙسیا جو سرائیکی اچ کل 46 آوازاں ہن جئیں کیتے 56 علامتاں استعمال تھیندن۔
