اقوام متحدہ ۔16فروری(اے پی پی):پاکستان اقوام متحدہ دی سلامتی کونسل اچ نویں مستقل ارکان دی تعداد ودھاوݨ دی مخالفت دا اعادہ کریندے ہوئیں ایں ڳالھ تے زور ݙتے جو مستقل نشستاں اچ کوئی وی ودھارا 15 رکنی ادارے کوں مفلوج کرݙٰیسی تے چھوٹے تے درمیانے درجے دے ارکان دی اکثریت کوں ادارے اچ خدمات دی فراہمی توں روک سڳسی ۔ اقوام متحدہ اچ پاکستان دے مستقل مندوب منیر اکرم گزریل ݙینھ سلامتی کونسل اچ اصلاحات دے مقصد توں تعطل دا شکار بین الحکومتی مذاکرات (آئی جی این ) اچ مندوبین کوں ݙسایاجو سلامتی کونسل دی توسیع اچ مساوی نمائندگی کوں ودھارا ݙتا ونڄݨا چاہیدے نہ جو ایندے توں نویں تاریخی ناانصافی پیدا تھیوے۔ پاکستانی مندوب ایشیائی، افریقی، لاطینی امریکی، کیریبین اتے بحرالکاہل اچ واقع جزائرتے مشتمل ملکاں دے گروپ دی طرفوں ھک تجویز تے بحث اچ حصہ گھندے پئے ہن ، جیں کوں’’ ایل 69 ماڈل‘‘آکھیا ویندے جیں دا مقصد سلامتی کونسل دی تنظیم نو کرݨا اے۔ پاکستانی مندوب ایں ڳالھ دی نشاندہی کریندے ہوئیں مستقل رکنیت ہی سلامتی کونسل دے مفلوج ہووݨ دی وجہ اے تے ایل 69 ماڈل توں ساݙا بنیادی مسئلہ مستقل نشستاں دی مجوزہ توسیع اے۔ سلامتی کونسل ایں ویلھے پنج سال مستقل ارکان تے مشتمل اے جنھاں اچ برطانیہ، چین، فرانس، روس اتے امریکا شامل ہن تے 10 غیر مستقل ارکان2 سال کیتے منتخب کیتے ویندن ۔ انہاں ایل 69 ماڈل دی مخالفت کریندے ہوئیں تجویز پیش کیتی جو وی ملک اقوم متحدہ دی سلامتی کونسل اچ مزید توسیع چاہندے ، اینکوں جنرل اسمبلی دے متواتر انتخابات دے جمہوری عمل دے ذریعے ایجھا کرݨا چاہیدے ۔ انہاں آکھیے ایل 69 ماڈل دی ھک شق دےتحت کجھ معاملات کوں ھک مخصوص مدت دے بعد اقوام متحدہ دی سلامتی کونسل دے ایجنڈے توں ہٹایا ونڄ سڳدے ۔
