جدہ۔21فروری(اے پی پی) اسلامی تعاون تنظیم (او آئی سی) غزہ دی پٹی اچ وحشیانہ اسرائیلی جارحیت مکاوݨ سانڳے اقوام متحدہ دی سلامتی کونسل دی قرارداد دے مسودے کوں منظور کرݨ اچ ناکامی تے ݙکھ تے افسوس کیتے ۔ اسلامی کانفرنس تنظیم دی طرفوں جدہ اچ جاری بیان اچ او آئی سی قرارداد دے مسودے دے خلاف امریکہ دی طرفوں ویٹو دے استعمال تے وی افسوس کیتے تے اینکوں بین الاقوامی امن و سلامتی دی بحالی، شہریاں دے تحفظ اتے غزہ دی پٹی اچ انسانی امداد ݙیوݨ کوں یقینی بݨاوݨ اچ سلامتی کونسل دے کردار دی منفی عکاسی قرارݙتے ۔ او آئی سی عالمی برادری بالخصوص سلامتی کونسل توں آپݨی ذمے واریاں ادا کرݨ تے غزہ دی پٹی اچ فلسطینی عوام کوں پیش نسل کشی روکݨ سانڳے وختی اقدامات دا مطالبہ کیتے ۔
