بہاولپور۔23 فروری (اے پی پی):دربارحضرت چنݨ پیرداسالانہ عرس ہرسال 11فروری توں 10اپریل تئیں تھیندے ،عرس اچ زائرین پرے دے علاقیں توں ہر خمیس کوں آندن تے کھلے آسمان تلے رات گزریندن ۔ محکمہ اوقاف ڈپٹی کمشنر کوں مقامی چھٹی دی تحریری درخواست کرݙتی۔ تفصیل موجب ڈسٹرکٹ منیجراوقاف دی طرفوں ڈپٹی کمشنر کوں جاری کیتے ڳئے مراسلے اچ ݙسایا ڳئے جو اے عرس نہ صرف چولستان بلکہ ضلع بہاولپوراچ رہݨ آلے لوکاں سانڳے ثقافتی میلہ اے اتے ہر سال ضلعی انتظامیہ ایں ثقافتی عرس دے سلسلے اچ پنجویں خمیس کوں لوکل چھٹی دا اعلان کریندی اے ، اے ثقافتی عرس وݙے عرصے توں چلیا آندے لہٰذا زائرین اتےعوام الناس کوں ثقافتی میلے اچ رلݨ تے تفریح داموقع ݙیوݨ سانڳے چوتھی خمیس رمضان المبارک توں پہلے مورخہ 7 مارچ 2024ء خمیس کوں لوکل چھٹی دا نوٹیفکیشن جاری کیتا ونڄے۔
