جنیوا ۔16مئی (اے پی پی):عالمی ادارہ صحت آکھیے جو دل دیاں شریاناں دے امراض یورپ اچ 40 فیصد اموات دی وجہ ہن،اے ھک ݙینھ اچ 10ہزاراتے سال اچ 40 لکھ اموات دے برابر اے۔عالمی ادارۂ صحت دی یورپ برانچ دے ڈائریکٹر ہانس کلیوگ یورپی لوکاں تے زور ݙتے جو او کھاݨے اچ لُوݨ دی مقدار گھٹاون۔ انہاں آکھیے لُوݨ دی مقدار 25 فیصد تئیں گھٹ کرݨ تے عمل درآمد نال 2030 تئیں دل دیاں بیماریاں تے قابو پاتے9لکھ جاناں بچائیاں ونڄ سڳدن ۔یورپ اچ 30 توں 79 سال دی عمر دے ترائے اچوں ھک بالغ فرد ہائی بلڈ پریشر دا شکار اے جیں دی وجہ اکثر لُوݨ دا استعمال اے ۔عالمی ادارۂ صحت دی تجویز کیتی ڳئی لوݨ دی اوسط مقدارودھ توں ودھ پنج گرام یا ھک چاہ دا چمچ ھک ݙینھ اے جݙاں جو ادارے دے یورپی خطے دے 53 اچوں 51 ملکاں دے لوک ایں توں ودھ مقدار استعمال کریندن جیں دی وݙی وجہ پروسیس شدہ کھاݨے اتے سنیکس ہن۔عالمی ادارۂ صحت آکھیے زیادہ نمک دا استعمال بلڈ پریشر ودھیندے جیں توں امراضِ قلب مثلاً دل دے دورے اتے سٹروک دا خطرہ ودھ ویندے۔ادارے آکھیے یورپ اچ بلڈ پریشر دے مریضاں دی تعداد پوری دنیا اچ ساریں توں ودھ اے ۔
