آستانہ۔4جولائی (اے پی پی) شنگھائی تعاون تنظیم معیشت اتے سلامتی سودھا مختلف شعبیاں اچ تعاون دے فیصلاں دی منظوری ݙے ݙتی۔ وزیر اعظم محمد شہباز شریف 3 اتے 4 جولائی کوں آستانہ، قازقستان اچ ایس سی او کونسل آف ہیڈز آف سٹیٹ (سی ایچ ایس) دے اجلاس اچ پاکستانی وفد دی اڳواݨی کیتی۔ کونسل آف ہیڈز آف اسٹیٹ( سی ایچ ایس ) اہم علاقائی و عالمی سیاسی، سیکورٹی اتے اقتصادی مسائل، چیلنجز اتے پیشرفت تے الایا۔ کونسل تعاون دے مختلف شعبیاں اچ تقریباً 20 فیصلیاں دی منظوری ݙتی۔ آستانہ اعلامیہ کوں اپناوݨ دے علاوہ سی ایچ ایس 3 بیانات اپنائن جیندے اچ پیوݨ دے پاݨی اتے صفائی، ویسٹ مینجمنٹ دا مؤثر انتظام اتے چنڳاں ہمسایہ ہووݨ دے اصول شامل ہین۔ کونسل اقتصادی اتے سلامتی دے شعبیاں اچ جاری تعاون کیتے مختلف منصوبیاں اتے حکمت عملیاں دی وی منظوری ݙتی۔ ماحولیات دے تحفظ سانڳے ہک معاہدے تے ایس سی او دے متعلقہ وزراء دستخط وی کیتن۔ سی ایچ ایس سربراہی اجلاس اچ وزیر اعظم شہباز شریف “شنگھائی سپرٹ” کیتے پاکستان دا عزم ݙسیندے آکھیا جو مشترکہ خوشحالی اتے ترقی کیتے باہمی اعتماد اتے احترام ضروری اے۔ اقوام متحدہ دے چارٹر دے مقاصد اتے اصولاں تے الیندے وزیراعظم اقوام متحدہ دے مرکزی ہم آہنگی دے کردار اتے اقوام متحدہ دی سلامتی کونسل دیاں متعلقہ قرارداداں دے مطابق دیرینہ تنازعات کوں پرامن طریقے نال حل کرݨ تے زور ݙتے۔ وزیراعظم غزہ دی صورتحال تے پاکستان دے اصولی موقف کوں اڳونہا کیتا اتے پرامن و خوشحال افغانستان دی اہمیت تے الایا۔ انہاں پاکستان دے سٹریٹجک جغرافیائی محل وقوع کوں ایس سی او دے پورے خطے کیتے ہک مثالی تجارتی و ٹرانزٹ حب دے طور تے وی اڳونہا کیتا۔ ایس سی او کونسل آف ہیڈز آف گورنمنٹ (سی ایچ جی) دے چیئرمین دے طور تے، پاکستان باہمی دلچسپی دے شعبیاں اچ ایس سی او دے رکن ملکاں وچال تعاون ودھاوݨ کیتے کم جاری رکھسی۔(
