اسلام آباد۔6جولائی(اے پی پی)چیئرمین پاکستان کرکٹ بورڈ محسن نقوی دی اڳواݨی اچ پی سی بی دے بورڈ آف گورنرز دا 72 واں اجلاس تھئے جیندے اچ مالی سال25۔ 2024 دے بجٹ تخمینیاں دی منظوری ݙتی ڳئی۔ ڈویلپمنٹ بجٹ نال قذافی سٹیڈیم، نیشنل بینک سٹیڈیم کراچی اتے راولپنڈی سٹیڈیم دی اپ گریڈیشن کیتے 12 ارب 80 کروڑ روپے رکھیے ڳن۔ ڈومیسٹک کرکٹ سانڳے 4 ارب 50 کروڑ روپے دے فنڈز رکھین، پی سی بی ڈومیسٹک کرکٹ دے 12 گراونڈز دی آپ ݙیکھ ٻھال کریسی، ملک اچ 100 گراؤنڈز دے عملے اتے ݙیکھ بھال کیتے فنڈز وی پی سی بی ݙیسی۔ ڈومیسٹک کرکٹ دے کھلاڑیاں دے کنٹریکٹ ودھاوݨ دی منظوری وی ݙتی ڳئی۔ ویمن کرکٹ دا بجٹ پہلی واری 70 لکھ روپے توں ودھا تے 2 کروڑ 40 لکھ روپے کیتا ڳئے۔ اجلاس اچ آندے سال پاکستان اچ آئی سی سی چیمپئنز ٹرافی دیاں تیاریاں تے کی بریفنگ ݙتی ڳئی۔ چیئرمین پی سی بی محسن نقوی آکھیا جو چیمپئنز ٹرافی تےوں پہلے ہی سٹیڈیمز دی اپ گریڈیشن مکمل کیتی ویسی اتے شائقین کرکٹ کیتے سہولتاں ودھسن اتے عالمی معیار دے انتظامات کیتے ویسن۔ اجلاس اچ بورڈ آف گورنرز دے ممبران چیف سیکرٹری پنجاب زاہد اختر زمان، سجاد علی کھوکھر،ظفر اللہ، تنویر احمد،طارق سرور،ڈاکٹر انوار احمد خان، محمداسماعیل قریشی،معراج محمود، اسامہ اظہر اتے ڈائریکٹر ڈومیسٹک کرکٹ عبداللہ خرم نیازی شرکت کیتی۔(
