اقوام متحدہ ۔26جولائی (اے پی پی) اقوام متحدہ آکھیا جو دنیا کوں شدید گرمی دے اثرات توں بچاوݨ کیتے فوری کاروائی دی لوڑھ اے۔ شدید گرمی دا زمین تے برا اثر پوندا پئے جئیں نال نبڑݨ کیتے فوری اقدامات کرݨے پوسن۔ اے ڳالھ اقوام متحدہ دے سیکرٹری جنرل انتونیوگوتریش عالمی ادارے دے ہیڈ کوارٹر اچ پریس کانفرنس اچ آکھی۔ انہاں آکھیا جو امریکا توں افریقا دے ساحل اتے یورپ توں ایشیا تئیں گرمی دی شدت ودھ ڳئی اے۔ ایں سال حج دے موقع تے سعودی عرب اچ وی 1300 توں ودھ حاجی جاں بحق تھین۔ انہاں آکھیا جو گرمی ساریاں کوں ہکو سواں متاثر نی کریندی پر جیڑھے لوکاں کوں ساریاں توں ودھ خطرہ اے انہاں اچ غریب شہری، حاملہ تریمتیں، ٻال، بݙھڑے،معذور، بیمار اتے بے گھر لوک شامل ہن۔ اقوام متحدہ دے اندازیاں موجب ݙوݙھاکیاں اچ 65 سال توں ودھ عمر دے لوکاں دی گرمی پاروں تھیوݨ آلی اموات اچ 85 فیصد ودھارا تھیے۔ اڄ کل سارے ٻالاں اچوں 25 فیصد ولا ولا گرمی دی لہراں دا شکار ہن اتے 2050 تئیں اے تعداد 100 فیصد ودھ سڳدی اے۔ اساکوں کاربن کولنگ تئیں رسائی اچ وݙے پیمانے تے ودھارا کر تے، غیر فعال کولنگ کوں ودھاوݨا چاہیدے۔
