اقوام متحدہ ۔30جولائی (اے پی پی) اقوام متحدہ آکھیا جو اسرائیلی فوج دے انخلا دے نویں احکامات نال غزہ دے بے گھر فلسطینیاں کوں ٻئی اوکھ تھیسی۔ اقوام متحدہ دے انسانی ہمدردی دے ادارے دے حکام موجب غزہ اچ نویں جبری نقل مکانی فلسطینیاں کوں ٻئے اوکھ اچ پا سڳدی اے۔ فلسطینی پناہ گزیناں دی مدد کرݨ آلی اقوام متحدہ دی ایجنسی یواین آر ڈبلیو اے ایکس جاری پوسٹ اچ آکھیا جو اسرائیلی فوج ولوں جاری تھیے انخلا دے احکامات نصیرات اتے بریج پناہ گزین کیمپاں کوں ٻہوں متاثر کیتے اتے غزہ اچ فلسطینیاں دے تحفظ دا کوئی وجود کائنی۔ یو این آر ڈبلیو اے دے کمشنر جنرل فلپ لازارینی آکھیا جو غزہ دا تقریباً ہر ہک مکین اسرائیلی فوج دے انہاں حکم توں متاثر تھیے۔غزہ اچ اقوام متحدہ دے ڈپٹی ہیومینٹیرین کوآرڈینیٹر اتے یو این آر ڈبلیو اے دے امور دے ڈائریکٹر سکاٹ اینڈرسن آکھیا جو غزہ اچ کہیں ویلھے کڄھ وی تھی سڳدے۔ اسرائیلی حملیاں پاݨی دے پلانٹ کوں تباہ کر ݙتے جئیں پاروں لوکاں کوں پاݨی پڄاوݨ دی اساݙی صلاحیت متاثر تھئی اے۔ اقوام متحدہ دے اڄوکے اعدادوشمار ݙسیندن جو غزہ اچ ترانوے فیصد سکولاں کوں نقصان تھیے اتے ٻہوں براہ راست متاثر تھین۔ ٻہوں سارے سکولاں اچوں ہک تہائی یواین آرڈبلیو اے سکول ہن، جئیں اچ تقریبا14ہزاراساتذہ تقریباً 3 لکھ 70ہزا ر طلباکوں پڑھیندے ہن۔
