تہران ۔12اگست (اے پی پی) ایران دے صدر مسعود پزشکیان دے معاون برائے تزویراتی امور محمد جواد ظریف آپݨے تقرر دے ݙاہ ݙینھ بعد مستعفی تھیوݨ دا اعلان کر ݙتے۔ العربیہ اردو موجب اے اعلان صدر پزشکیان ولوں پارلیمنٹ اچ پیش کیتی ڳئی وزرا دی فہرست تے احتجاجاً سامھے آئے۔ جواد ظریف موجب مجوزہ حکومت اقلیت، تریمتیں اتے نینگراں دی نمائندگی نی کریندی۔ صدر مسعود پزشکیان اگست دے شروع اچ محمد جواد ظریف کوں تزویراتی امور کیتے آپݨا نائب مقرر کیتا اتے نال ای جواد ظریف کوں صدارتی تزویراتی تحقیقات دے مرکز دی ذمے واری وی ݙتی ڳئی ہئی۔ جواد ظریف مختلف بین الاقوامی اتے مقامی منصباں تے فائز رہ چکین انہاں اچ وزیر خارجہ، وزارت خارجہ دے سینئر مشیر، وزیر خارجہ دے نائب برائے قانونی و بین الاقوامی امور، بین التہذیبی مکالمے دے منصوبے دے نشابر رکن اتے اقوام متحدہ دے زیر انتظام تخفیف اسلحہ کمیٹی دے چیئرمین دا منصب شامل اے۔
