اسلام آباد۔ 15 اگست(اے پی پی)سرائیکستان قومی کونسل صوبہ سرائیکستان ٻݨواوݨ کیتے اسلام آباد تئیں پیدل مارچ کرݨ اتے دھرنا ݙیوݨ دا اعلان کریندے مانگ کیتی اے جو مسلم لیگ ن اتے پاکستان پیپلزپارٹی دی اتحادی حکومت اپݨے پارٹی منشور اتے وعدے دے مطابق جنوبی پنجاب دے عوام کوں انہاں دا جائز حق ݙیوݨ کیتے صوبہ سرائیکستان ٻݨاوݨ کیتے خصوصی کمیشن ٻݨاوݨ دا تیکھے اعلان کرن۔ اے مانگ دھریجہ نگر اچ سرائیکستان تھیوݨ آلے قومی کونسل دے اہم اجلاس اچ کیتی ڳئی جیندی اڳواݨی چیئرمین ظہور احمد دھریجہ کیتی۔ اجلاس اچ فیصلہ تھئے جو حکومت اکتوبر تئیں انڄھ صوبہ ٻݨاوݨ لو خصوصی کمیشن ٻݨاوے نتاں سرائیکستان قومی کونسل اسلام آباد تئیں پیدل مارچ کریسی اتے دھرنا وی ݙتا ویسی۔ اجلاس نال الیندے چیئرمین سرائیکستان قومی کونسل ظہور احمد دھریجہ دا آکھݨ ہا جو ونݙ توں پہلےاتے بعد دے مختلف ادوار اچ سرائیکی علاقیاں کوں انہاں دی منشا دے بغیر پنجاب اتے اوں ویلھے دے صوبہ سرحد اچ رلا ݙتا ڳیا ہا، حالانکہ ریاست بہاولپور پنجاب اتے خیبرپختونخواہ نال نئیں صرف پاکستان نال رلݨ دا آکھیا ہا۔ انہاں آکھیا اساں کوئی انڄھ ملک نئیں ٻھل اپݨی انڄھ اتے نویکلی سنڄاݨ کیتے اپݨا صوبہ منگدے ہیں، انڄھ صوبہ ٻݨݨ نال نا صرف وفاق متوازن تھیسی ٻھل سینیٹ اچ وسیب کوں متناسب نمائندگی ملسی اتے اتھو دے عوام دا احساس محرومی مکاوݨ اچ وی ہتھ ونݙیسی۔ انہاں یاد ݙویندے آکھیا جو قائد اعظم محمد علی جناح سندھ کوں صوبہ بمبئی اچ رلاوݨ دے خلاف اپݨے تاریخی مقدمے اچ مضبوط دلائل ݙتے ہن جو لوکاں کوں انہاں دی رضا مندی دے بغیر کہیں ٻئے نال زبردستی نئین رلایا ونڄ سڳدا، اے انہاں دے بنیادی حقوق اتے قوانین دے خلاف اے، اساں قائد دے انہائیں دلائل دی بنیاد تے صوبہ سرائیکستان دا حق منڳدے ہیں۔ انہاں آکھیا جو جنوبی پنجاب کوں انڄھ صوبہ ٻݨاوݨ پاکستان مسلم لیگ اتے پاکستان پیپلزپارٹی ݙوہاں جماعتاں دے انتخابی منشور اچ شامل اہے، ہݨ اتحادی حکومت دا ݙو ترہائی اکثریت دے باوجود انڄھ صوبہ ݙیوݨ دا وعدہ توڑ نا پچاوݨ بلا جواز اے، اگر اکتوبر تئیں صوبہ سرائیکستان کیتے کمیشن نا ٻݨایا ڳیا تاں سرائیکستان قومی کونسل اسلام آباد تئیں پیدل مارچ کرݨ اتے دھرنا ݙیوݨ دے حتمی لائحہ عمل دا اعلان کریسی۔
