اسلام آباد۔15اگست(اے پی پی)اسلامیہ یونیورسٹی بہاولپور دے شعبہ سرائیکی ولوں ہک اہم اجلاس تھئے جیندی اڳواݨی شعبہ دے چئیرمین ڈاکٹر ممتاز خان کیتی۔ اجلاس دے مہمان خصوصی ڈاکٹر عصمت اللہ شاہ ہن۔ اجلاس اچ یونیورسٹی دی داخلہ جاتی مہم، سرائیکی اے ڈی پی (ایسوسی ایٹ ڈگری پروگرام)، بی ایس سرائیکی دے سلیبس اتے امتحانی پرچیاں دے مسئلیاں تے گالھ مہاڑ سودھا مختلف تجویزاں پیش کیتان ڳن۔
اجلاس اچ سرائیکی استاداں دے فورم بہاول پور ڈویژن دے اراکین شرکت کیتی جیندے اچ ڈاکٹر عصمت اللہ شاہ، ڈاکٹر امجد رضا، ڈاکٹر نواز ساجد، وارث ملک، صابر شفیق، عابد خان گورگیج، محمد آصف، وزیر چنڑ، راشد رسول، شفقت رسول، محمد اسماعیل وڈیرا اتے خالد نجیب شامل ہن۔ تریمتیں استانیاں اچ ڈاکٹر روبینہ شہناز، فرخندہ بخاری، حمیدہ کوثر، شمائلہ منظور، نوشین منظور، سعدیہ بی بی، شگفتہ ناز، اسلیم بی بی، ارم جمیل، اتے حنا اقبال وی شرکت کیتی۔ شعبہ سرائیکی، اسلامیہ یونیورسٹی بہاولپور دی نمائندگی کریندے ڈاکٹر ممتاز خان دے نال ڈاکٹر بدر مسعود، اطہر لاشاری اتے نورین منظور وی موجود ہن۔ اجلاس اچ حفیظ طاہر گھوٹیہ وی شرکت کیتی۔
اجلاس دے بعد ڈاکٹر ممتاز خان، ڈاکٹر عصمت اللہ شاہ، اتے اطہر لاشاری رجسٹرار نال ملاقات کیتی جیندے اچ بی ایس سرائیکی دیاں فیساں اچ گھٹکی کیتے ہک قرارداد پیش کیتی، جیندا مقصد طلباء کوں مالی طور تے سہولت ڈیونڑ تے سرائیکی زبان دی تعلیم کوں بیا وودھاونڑاں ہئی۔
اے پی پی نیوز سروس نال گالھ مہاڑ کریندے ڈاکٹر ممتاز خان آکھے جو سلیبس تے امتحانی پرچیاں دے کئی مسلیاں دا فوری حل تھیوݨ ضروری اے، اجلاس اچ نصاب تے امتحانات دے معیار کوں چنگا بنڑاون کیتے آوݨ آلیاں مختلف تجویزاں تے غور تھئے۔ ڈاکٹر عصمت اللہ شاہ شعبہ سرائیکی دے استاداں دے کٹھے تھیوݨ کوں فیدہ مند قرار ݙیندے آکھیا جو اینڄھے کٹھ نال یونیورسٹی اتے کالجاں دے استاداں وچال روابط مضبوط تھیسن اتے سرائیکی زبان و ادب دی ترقی دی راہ نکلسی۔
