اسلام آباد۔18اگست(اے پی پی) دھرتی دی عظیم خدمت دے ایں 49 سالہ سفر اچ اپݨے خطے دی محبت سانڳے کئی شخصیات خدمت کیتی۔ اے پی پی نیوز نال ڳالھ کریندے صحافی شاہد اجمل ملک دا آکھݨ ہئی جو اے چتھالی سال محمد اجمل ملک دی ساری زندگی اے ۔ ایویں لڳدے جو ریڈیو پاکستان دی اے سالگرہ محمد اجمل دی سرائیکی دھرتی اتے وسیب دے لوکاں نال محبت دی داستان اے۔ ریڈیو پاکستان بہالپور اتے محمد اجمل ملک دی محبت دے سفر دا آغاز 18 اگست 1975 کوں ریڈیو بہالپور دی نشریات دے آغاز توں تھیا تے ول 24 ستمبر 2021 کوں انھاں دی وفات تئیں جاری رہیا۔سرائیکی وسیب دی مقبول ترین آواز محمد اجمل ملک ریڈیو پاکستان بہاولپور دے آغاز توں ہی آپݨی دلکش آواز عوام دے زریعے لکھاں سݨݨ آلیں دے ول اچ جاہ بݨا ڳھدی تے چار ݙھاکیں توں ودھ ریڈیو پاکستان دی پروفیشنل براڈ کاسٹنگ دا حصہ رہیے۔ شام دے ریڈیو پروگرام وسدیاں جھوکاں جیڑھا جو بعد اچ جمہوردی آواز بݨیا، ریڈیو تاریخ دے ایں معروف ترین پروگرام دے ذریعے تعلیم، سماج اتے سیاست تے آپݨی دل کوں موہ گھنݨ آلی آواز نال جیڑھی شہرت محمد اجمل ملک کوں سرائیکی خطے اچ ملی اے او شاید گھٹ خوش نصیباں دے حصے اچ آندی اے ۔ پروگرام جمہور دی آواز اچ ملک تے میاں سئیں دی جوڑی ٻہوں مقبول تھئی ہئی۔ ایں پروگرام اچ میاں عبدالرحمن اخضر” میاں سئیں” دا کردارنبھیندے ہن تے محمد اجمل ملک “ملک صاحب” دا کردار نبھیندے ہن ۔ ملک ،میاں سامعین سانڳے ھک معلومات دا خزانہ ہن ملک اتے میاں سئیں دی اے جوڑی ھک وݙے عرصے تئیں ریڈیو سامعین دی خدمت کریندی رہی۔میاں عبدالرحمن اخضر دے بعد ڈاکٹر نصراللہ خان ناصر، ساجد حسن درانی، حسین احمد مدنی، محمد شفیق مغل، ملک محمد صدیق، عبدالمجید خان، محمداختر بھٹی، شمس الدین حیدر، رئیس محمد سلیم اتےارشاد احمد بھٹی دے علاوہ کئی ٻئے بہترین کمپئیرز وی محمد اجمل ملک دے رلے ساتھی میزبان دے طور تے پروگرام جمہور دی آواز اچ میزبانی کریندے رہیے۔مرحوم محمد اجمل ملک ریڈیو پروگراماں توں عوامی آگاہی اتے مذہبی ہم آہنگی تے وی ٻہوں کم کیتا ۔ رسول پاک ﷺ نال سچی محبت اچ بزم ثنائے خیرالوری بݨائی تے پورے ملک اچ نعت دے ودھارے سانڳے کم کریندے رہیے ۔ بہالپور صوبہ بحالی تحریک دے ساریں توں پہلے قائدین اچ رلیے ، صوبہ بحالی تحریک اچ سیاسی قیدی رہیے، بہالپور دے حقوق سانڳے وݙی سیاسی جماعت بݨائی تے ساری عمر سابق ریاست بہالپور اتے سرائیکی وسیب دے حقوق و ترقی سانڳے آواز چیندے رہیے ۔محمداجمل ملک دا ٻہوں مقبول پروگرام “روہی رنگ رنگیلڑی” چولستان سودھے جنوبی پنجاب اتے وسیب دے سامعین اچ ٻہوں مقبول تھیا ۔ انھاں ریڈیو پاکستان بہالپورتوں نویں سویل، وستی وستی ڈیرہ ڈیرہ، سوجھلا اتے نیشنل ہوک اپ تے وݙی مد تئیں ٻئے پروگراماں دی وی میزبانی کیتی۔ ریڈیو پاکستان بہالپور توں محمد اجمل ملک دے ٻئے پروگرامز اچ “آپ کی فرمائش”، ریڈیو میلہ، محافل میلاد، روشنی، کرنیں ٻہوں مقبول تھئے ۔ریڈیو پاکستان بہالپور دی آواز محمد اجمل ملک انیس سو ستر دے ݙھاکے توں ݙوہزار پندراں تئیں پاکستان دے مختلف ہیڈز آف سٹیٹس ، صدر مملکت اتے وزرائے اعظم دے سرکاری پروگرامز دے میزبان وی رہیے۔محمد اجمل ملک دی خدمات دے اعتراف اچ انہاں کوں ٻہوں سارے قومی اتے علاقائی ایوارڈز دے نال نال ریڈیو پاکستان دے اعلی ترین حسن کارکردگی ایوارڈ نال وی نوازیا ڳیا ۔ریڈیو پاکستان بہالپور دی سالگرہ دے موقع تے ساݙی دعا اے جو ھک ہزار ترائے سو اکتالی کلو ہرٹز تے “وسیب دی آواز” صدا گونجتی رہے۔(ڈاکٹر سعدیہ کمال)
