لاہور۔18اگست(اے پی پی) پی ڈی ایم اے آندے 36 گھنٹے جنوبی پنجاب دے ضلعیں اچ فلیش فلڈنگ دا الرٹ جاری کرݙتے ۔ ڈیرہ غازی خان، ملتان تے بہاولپور ڈویژنز اچ زور دا مینھ وٹھسے ۔ترجمان پی ڈی ایم اے موجب زور دے مینھ پاروں ٻہوں سارے ضلعیں اچ فلیش فلڈنگ دا ݙر اے تے ایں سلسلے اچ کمشنر ڈیرہ غازی خان، ملتان تے بہاولپور کوں الرٹ جاری کرݙتا ڳئے ، ایویں ڈپٹی کمشنرز راجن پور ،کوٹ ادو، لیہ، مظفرگڑھ خانیوال، لودھراں ،وہاڑی، رحیم یار خان اتے بہاولنگر کوں وی الرٹ جاری کرݙتا ڳئے ۔ ڈی جی پی ڈی ایم اے عرفان علی کاٹھیا انتظامیہ کوں الرٹ رہݨ دی ہدایت جاری کریندے آکھیے ہنگامی صورتحال نال نبݨݨ سانڳے سارے محکمے الرٹ رہن ،پی ڈی ایم اے کنٹرول روم اچ صورتحال دی مانیٹرنگ جاری اے۔ڈی جی عرفان علی کاٹھیا آکھیے 1122 سودھے ٻئے ریسکیو ادارے مشینری سودھے عملے کوں الرٹ رکھن،نشینی علاقوں توں پاݨی وختی کڈھن ،شہری احتیاط کرن ، بجلی کھمبے ،لڑکدیاں تاراں ،کچے مکان تے پراݨیاں عمارتاں توں ھک پاسے رہن ۔ڈی جی پی ڈی ایم اے مزید آکھیے شہری خراب موسم دی صورتحال اچ غیر ضروری سفر نہ کرن ،ٻالاں دا خیال رکھن انھاں کوں جمع پاݨی دے نیڑے اصلوں نہ ونڄݨ ݙیون ہنگامی صورتحال اچ پی ڈی ایم اے دی ہیلپ لائن 1129 تے کال کرن
